Eis Prezidente Repúblika, Ramos Horta, Imajen TATOLI/António Gonçalves

DILI, 01 juñu 2021 (TATOLI)—Eis Prezidente Repúblika, José Ramos Horta, konsidera alterasaun daneen lei númeru 7/2006, loron 28 dezembru, Lei Eleitorál ba Prezidente Repúblika (PR) tenke iha espíritu Konstituisaun Repúblika Demokrátika Timor-Leste (RDTL).

“Alterasaun ka la alterasaun tenke tuir letra espíritu Konstituisaun, iha alterasaun ruma tanba motivisaun polítika ne’ebé la tuir letra no espíritu Konstituisaun ne’e bele hetan problema boot iha nível nasionál no internasionál, ne’ebé lei ne’e tenke refleta ita-nia esperiénsia tinan 20 nia laran no reflete ita-nia Konstituisaun, ne’e de’it mak ha’u preokupa,” Horta hateten hafoin ramata reuniaun ho Primeiru-Ministru, Taur Matan Ruak, iha Rezidénsia Farol, tersa ne’e.

Notísia relevante: PN baixa proposta-alterasaun lei eleitorál PR ba Komisaun A

Objetivu prinsipál alterasaun maka atu garante katak sidadaun hotu bele iha biban ezerse direitu demokrátiku, nune’e hadi’a liután prosesu eleitorál hanesan halo rejistu fasil liu no seluk tan.

“Altera atu hadi’a prosesu eleitorál ha’u hanoin normál, ezemplu ejize kandidatu prezidensiál antes tenke iha asinatura 5.000, maibé hafoin altera iha mudansa katak tenke aprezenta asinatura 20.000 ne’e ha’u konkorda, nune’e lebele kandidatu arbiru tanba la konsege iha asinatura to’o 10.000 ka 20.000 tanba de’it kandidatura di’ak liu lalika lakon tempu,” nia akresenta.

Nia dehan, altera atu limita idade ba kandidatu ne’e mak viola ona letra esperituál Konstituisaun no ona atu taka dalan ba ema balun karik,” Horta subliña.

Foin lalais ne’e, liuhosi reuniaun Konsellu Ministru aprova Projetu Proposta Lei, ne’ebé aprezenta hosi Ministru Administrasaun Estatál (MAE), Miguel Pereira de Carvalho, kona-ba Lei Eleitorál ba PR.

Alterasaun ne’e mai ho objetivu hodi adapta ba situasaun atuál iha kontestu pandemia COVID-19 no reforsu ba kapasitasaun ba nesesidade sidadaun sira.

Nune’e mós, prosede ba reforsu rekizitu formál kandidatura nian, klarifikasaun no organizasaun prosesu eleitorál inklui fasilita kondisaun ba direitu votu sidadaun sira.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here