Segundu Komandante PNTL Dili, Superintendente Polísia, Euclides Belo, fó-hatais roupa ba abitante ida ne’ebé sofre moras mentál. Imajen/PNTL.

DILI, 31 maiu 2021 (TATOLI)—Polísia Nasionál Timor Leste (PNTL), liu hosi Komandu munisípiu Dili, preokupadu ho ‘ema ho moras mentál’ ne’ebé oras-ne’e movimentu makaas iha sidade Dili.

Segundu Komandante PNTL munisípiu Dili, Superintendente Polísia, Euclides Belo, hateten preokupasaun ne’e mosu tanba durante ne’e iha observasaun katak, númeru ema ho moras mentál iha Dili aumenta, no barak liu movimetu makaas iha estrada públiku, tanba família la tau-matan.

Notísia relevante:Ema Moras Mental Baku Membru BOP Ida To’o Matan Fukun Naklees

Nune’e, ohin, Superintendente Polísia, Euclides Belo tun direta ba observa hodi tulun maluk ne’ebé ho moras mentál, iha área suku Caicoli, besik estádiu munisipál Dili.

Sidadaun ne’ebé ho moras mentál, durante ne’e movimentu hela iha sidade no família la tau-matan, nune’e, Euclides Belo lori roupa hodi fó-hatais inklui oferese hahán-tasak atu bele konsumu.

“Ami preokupa ho ema-sira ne’ebé sofre moras mentál la’o iha dalan públiku. Ita tauk tanba sira bele hetan asidente. Nune’e, liña komandu orienta atu ajuda mós ita-nia povu ne’ebé sofre moras no halo movimentu ba-mai iha estrada públiku,” Euclides Belo, hateten ba jornalista-sira iha Komandu PNTL, Caicoli, segunda ne’e.  

Euclides Belo dehan, iha semana kotuk, oferese ona roupa ba sidadaun ne’e iha área Mandarin, bainhira komandu simu informasaun hosi komunidade, inklui Komandante Jerál PNTL, Komisáriu Polísia, Faustino da Costa mós preokupadu ho situasaun ne’e.

Tuir planu, PNTL sei koordena ho Organizasaun Naun Govermentál (ONG) no Ministériu Solidariedade Sosiál no Inkluzaun (MSSI), hodi transporta abitante ne’ebé ho moras mentál, lori ba hela iha uma reabilitasaun iha Dili no Laclubar-Manatuto.

“Nu’udár umanu ita fó apoiu ba sira maski laiha valór, maibé ida-ne’e hanesan asaun umanu ajuda hirak ne’ebé presiza ita-nia tulun,” nia subliña.

Provizoriamente, PNTL rekolla dadus iha Dili laran, abitante feto iha na’in-haat no mós mane balun tan sofre moras mentál la’o ba mai no toba iha trotoár leten.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here