Suspeitu moras Mental hetan detensaun tanba baku membru BOP ida. Imajen/Domingos Piedade

DILI, 25 outubru 2019 (TATOLI) – Tribunal Distritál Dili (TDD), ohin, loke prosesu primeiru interrogatóriu ba suspeitu AJF ne’ebé ho kondisaun saúde moras mental.

Notísia Relevante : Arguido Tenta Soke Aviaun Sriwijaya Sofre Mental

Maske moras mental, maibé suspeitu AJF tenke ba enfrenta justisa iha Tribunal Distritál Dili hodi responsabiliza ba nia aktu krime tanba baku membru Polisia Nasional Timor-Leste (PNTL) Unidade Batallaun Orden Públiku (BOP) iha area Audian, Dili, tersa (22/10/2019).

Vítima AGC nu’udar membru BOP uza farda kompletu ba fotokópia dokumentu privadu balu. Bainhira remata, fotokópia vítima sai ba li’ur, no iha ne’ebá arguido kaer balde rega hela rai hodi kona vítima nia kalsa bokon hotu.

Notísia Relevante : Ema Moras Mentál Estraga Lampu iha Largo Lecidere

Haree ba hahalok ne’e, vítima hakat ba husu tuir kona-ba rega nia kalsa bokon hotu ne’e. Maibé suspeitu hamriik ba hakilar hodi lolo kedas tuku dala rua ba vítima nia oin hodi rezulta vítima nia matan fukun sorin naklees.

Ho suspeitu nia hahalok ne’e, Ministériu Públiku akuza ho  krime obstrusaun autoridade públika ne’ebé previstu iha artigu 243, tanba razaun baku vitima uza farda Polisia nian.

Tuir defeza Agustinha Mendonça, ne’ebé fasilita asisténsia legal ba suspeitu hateten, suspeitu iha kondisaun moras mental,no iha dokumentu atestadu médiku kompletu, tanba ne’e nia parte husu ba tribunal atu aplika medida seguransa internamentu ida. Maibé  MP mantein hodi husu medida prizaun preventiva ba suspeitu tanba haree suspeitu prienxe rekizitu baku autoridade publika ho farda.

Iha desizaun ikus tanba provas ne’ebé defeza ajusta hatudu duni katak suspeitu moras mental  no krime ne’ebé Ministériu Públiku akuza ho krime obstrusaun autoridade públika, Tribunal altera ba krime ofensa integridade fízika simples. Tanba ne’e, tribunal deside, aplika koasaun ida ho medida Termu de Identidade Rezidénsia (TIR) no pasa arguido hetan kedas liberdade detensaun.

Audiénsia ne’e prezide hosi juis, Antonio Fonseca, Ministériu Públiku reprezenta Prokuradór Matias Soares, no arguido hetan asisténsia legal hosi Defensora Públika, Agustinha Mendonça.

Jornalista : Domingos Piedade Freitas

Editór       : Francisco Simões

HAKEREK NO HATÁN

Please enter your comment!
Please enter your name here