Kondisaun uma iha área Ponte Comoro 3, Dili, ne’ebé hetan estragu hosi inundasaun ne’ebé akontese domingu (04/04/2021). Imajen TATOLI/António Gonçalves

DILI, 31 maiu 2021 (TATOLI)—Liuhosi reuniaun extraordinária Konsellu Ministru (KM), Governu deside halo renovasaun ba deklarasaun Estadu Kalamidade ba loron fulan rua tan.

Desizaun ne’e liuhosi aprovasaun Projetu Rezolusaun Governu, ne’ebé prosede ba renovasaun ba deklarasaun Estadu Kalamidade.

“Hafoin loron 04 abríl Governu halo deklarasaun Estadu Kalamidade no agora estende tan ba fulan-rua. Ida-ne’e importante atu fó dalan ba atuasaun Governu ba situasaun hirak ne’ebé mosu tanba dezastre naturál,” Ministru Prezidénsia Konsellu Ministru, Fidelis Manuel Leite Magalhães, relata hafoin reuniaun ezekutivu iha auditóriu Ministériu Finansa, Aitarak-laran, segunda.

Notísia relevante: Timor-Leste deklara Estadu situasaun kalamidade nível nasionál durante loron 30

Portavóz Governu dehan, deklarasaun Estadu Kalamidade ne’e tanba haree ba akontesimentu ne’ebé provoka hosi Siklone Tropikál Seroja, ne’ebé rezulta infraestrutura públika no privada barak mak hetan estragu.

Maski nune’e, Insitutu Jestaun Ekipamentu, Institutu Públiku (IGE,I.P) inklui entidade relevante no empreza nasionál sira kuaze konklui ona serbisu normalizasaun infraestrutura públika iha territóriu nasionál.

Ekipa interministeriál rejista estragu infraestrutura iha lokál 101 ho kustu millaun $245 ba rekuperasaun.

Notísia relevante: Normalizasaun estragu dezastre naturál iha territóriu nasionál atinje 99%

Tuir dadus, vítima afetadu inundasaun hosi munisípiu 12 inklui Rejiaun Administrativu Espesiál Oé-cusse Ambeno (RAEOA) hamutuk 21.889.

Daudaun ne’e, sentru akollimentu iha Dili hamutuk 31 ho totál uma-kain ne’ebé destakadu hamutuk 15.876.

Iha 16 abríl, refujiadu balun ne’ebé hela iha sentru akollimentu hahú fila ona ba sira-nia uma no hirak ne’ebé sei hela iha sentru akollimentu hamutuk 7.246.

Aleinde ne’e, dezastre naturál ne’e rezulta ona sidadaun na’in-42 lakon vida, kompostu hosi na’in-22 iha Dili, 10 iha Ainaro, lima iha Manatuto, na’in-tolu iha Viqueque no na’in-rua iha Aileu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here