Primeiru-Ministru, Taur Matan Ruak, prezide reuniaun Konsellu Ministru, iha Palásiu Governu, kinta (08/04). Imajen TATOLI/Egas Cristovão

DILI, 08 abríl 2021 (TATOLI)—Governu liuhosi reuniaun Konsellu Ministru aprova ona Projetu Rezolusaun Governu ba deklarasaun Estadu kalamidade iha nível nasionál ba períodu loron 30.

Portavós Governu no Ministru Prezidénsia Konsellu Ministru, Fidelis Manuel Leite Magalhães, hateten, deklarasaun ne’e hodi hasoru akontesimentu inundasaun iha munisípiu Dili iha dadeersan nakukun loron 04 abríl, ne’ebé provoka hosi siklone tropikál Seroja.

“Maski iha munisípiu seluk sofre ba dezastre naturál ne’e, maibé kategoria iha munisípiu sira la hanesan ho situasaun kamalidade iha Dili,” Ministru Fidelis hateten hafoin ramata reuniaun ezekutivu, iha Palásiu Governu, kinta ne’e.

Notísia relevante: Dezastre naturál, ema lakon vida aumenta ba na’in-42

Ba asaun ne’e, Governu kria ona grupu serbisu tékniku ne’ebé sei responsável ba identifikasaun infraestrutura no ekipamentu públiku koletivu ne’ebé hetan estraga hosi inundasaun no prepara proposta sira ba rekonstrusaun ka reabilitasaun.

Rezolusaun Governu ne’e, inklui bandu komunidade harii uma iha área inundasaun no área ho foho lolon ne’ebé natón to’o a’as tanba perigu tebes no forma utilizasaun rai ne’ebé bele aumenta risku.

Tuir dadus hosi Sekretária Estadu Protesaun Sivíl (SETP), akontesementu dezastre naturál ne’e rezulta ona sidadaun na’in-42 lakon vida, kompostu hosi na’in-22 iha Dili, 10 iha Ainaro, lima iha Manatuto, na’in-tolu iha Viqueque no na’in-rua iha Aileu.

Jornalista: Antónia Gusmão

Editora: Julia Chatarina

HAKEREK NO HATÁN

Please enter your comment!
Please enter your name here