Ministru Defeza, Filomeno da Paixão de Jesus. Imajen/ Egas Cristovao

DILI, 13 jullu 2020 (TATOLI)-Ministru Prezidénsia Konsellu Ministrus, Fidelis Manuel Leite Magalhães, ohin, hala’o enkontru ho Ministru Defeza, Filomeno da Paixão de Jesus no Ministru Transporte Telekomunikasaun, José Agostinho, hodi ko’alia  preparasaun kriasaun Autoridade Marítima Nasionál (AMN) ne’ebé Konsellu Ministrus sei aprova iha tempu besik.

“Ami ko’alia kona-ba sistema de marítima ho Autoridade de Marítima  ne’ebé ita sei funda iha Timor-Leste. Sistema ida ne’e ita ko’alia dezde 2009 agora ita atu implementa hodi haree ninia modelu no ninia servisu ne’e oinsá sei aprova iha reuniaun Konsellu Ministru,”  hateten Ministru Defeza Filomeno da Paixão de Jesus, ba jornalista iha Palaçio do Governo.

Governu planu hodi harii no define Autoridade ne’e nia knaar sira no ninia estrutura koordenasaun nian hakarak atu AMN sai nu’udar entidade responsavel ba koordenasaun atividade sira, iha ámbitu nasionál, ne’ebé sei ezekuta hosi Komponente Forsa Navál no hosi Diresaun Autoridade Marítima Nasionál, iha área jurizdisaun no kuadru Sistema Autoridade Marítima nian, kumpre ba instrusaun sira ne’ebé define ona hosi Ministru Defeza.

Governu sei analiza fila-fali kona-ba oinsá atu kria instituisaun ne’e no sei apresia fila fali iha sorumutuk Konsellu Ministru nian tuir mai.

Nia dehan, Ministériu Defeza no Ministériu Transporte no Telekomunikasaun rasik halo ona koordenasaun di’ak tebes hodi prepara proposta lei sira ba kriasaun AMN ne’ebé aprezenta ba Konsellu Ministru bele aprova hodi liña ministériu rua bele koordena ho liña ministériu seluk implementa koordenasaun servisu dezenvolve AMN.

AMN rasik sei implementa la’o tuir modelu Governu Portugál no nasaun seluk nian iha ASEAN hodi hadi’a no dezenvolve AMN ne’ebé sei lidera hosi Komandu F-FDTL hodi halo kontrolu ba soberania tasi Timor nian iha liña fronteira tasi, rai no lalehan.

Governu mós sei prepara rekursu no apoiu fasilidade servisu modernu ba AMN nian ne’ebé sei envolve liña ministériu lubuk ida hodi halo jestaun servisu ne’ebé transparente no profisionál hodi poupa osan Estadu nian.

Jornalista   : Eugénio Pereira

Editór        : Francisco Simões

 

HAKEREK NO HATÁN

Please enter your comment!
Please enter your name here