Atividade iha kampu Bayu-undan. Imajen/ANPM

DILI, 26 maiu 2021 (TATOLI)—Empreza Santos hahú mobiliza materiál perfurasaun mina-matan hodi halo instalasaun iha área kontratu kampu petrolíferu Bayu-undan.

Empreza Santos ne’ebé nu’udar operadór konsórsiu integra iha projetu kampu Bayu-undan, antes ne’e anúnsia ona katak programa perfurasaun mina-matan iha tasi laran (offshore) Timor-Leste sei hahú iha tinan ne’e.

Prezidente Autoridade Nasionál Petróleu no Minerál (ANPM), Florentino Soares Ferreira, konsidera atividade perfurasaun empreza australiana ne’e nu’udar momentu importante ida ba istória Timor-Leste.

“Santos mobiliza ona Noble Tom Proser, sondagem/rig, ne’ebé empreza sei halo perfurasaun iha área kontratu no daudaun halo hela montajen ba sondagem/rig ne’e,” Prezidente ANPM informa liuhosi nota ne’ebé Agência TATOLI asesu, kuarta ne’e.

Tuir nia, empreza petrolífera ne’e halo perfurasaun ba dahuluk, bainhira kampu Bayu-undan hanesan ona parte esklusiva ida iha jurizdisaun Timor-Leste, hafoin ratifikasaun Tratadu Fronteira Marítima entre Timor-Leste no Austrália.

Nune’e, ANPM no reprezentante Santos iha Dili, realiza seremónia fó bensaun ba Bandeira Repúblika Demokrátika Timor-Leste (RDTL), ne’ebé prezide hosi Padre iha Igreja Motael, ne’ebé Bandeira ne’e sei hasa’e durante implementasaun Faze 3C iha plataforma perfurasaun nia leten.

Programa ne’e, hetan ona desizaun finál ba investimentu iha janeiru tinan ne’e, kompostu hosi mina-matan tolu ba produsaun no sei dezenvolve rezerva adisionál gás naturál no líkidu, inklui produsaun hosi instalasaun sira iha tasi-klaran no planta LNG iha Darwin.

Tuir Prezidente ANPM, desizaun ba Faze 3C hosi investimentu ne’e pasa ona avaliasaun rigoroza, ho konsiderasaun ba fluxu-traballu krítiku relevante, ne’ebé inklui análize ekonómika no téknika, estratéjia akizisaun no konteúdu lokál inklui aprovasaun regulamentár atu prezerva valór ekonómika hosi projetu.

“ANPM rekoñese kompromisu sira ne’ebé kompartilla hosi Santos relasiona ho investimentu Faze 3C perfurasaun mina-matan hanesan oportunidade seluk ida atu masimiza rekuperasaun produsaun idrokarbonetu no hanaruk vida útil produsaun nian, ne’ebé ikus mai sei garante benefísiu ekonómiku ba parte interesada hotu no mós ba Estadu,” resposável ne’e afirma.

Iha sorin seluk, Diretór Ezekutivu no CEO, Empreza Santos, Kevin Gallagher, hateten, mina-matan sei fura uza torre perfurasaun auto-elevatória Noble Tom Prosser, ho produsaun dahuluk sei hahú iha trimestre datoluk tinan 2021.

“Liuhosi relasaun serbisu di’ak no konstrutivu ho Governu Timor-Leste, hamutuk ho Autoridade Nasionál  Petróleu no Minerál, no ami-nia parseiru joint venture mak ami bele konsege avansa rápidamente atu alkansa objetivu komún hodi masimiza valór kampu Bayu-undan,” Gallagher dehan.

Programa perfurasaun mina-matan ne’e sei aumenta tan barríl millaun 20 minarai, ne’ebé ekivalente rezerva bruta no produsaun, ho kustu abastesimentu kiik, kria kampu traballu inklui investimentu sira.

“Timor-oan hamutuk 400 resin mak agora daudaun serbisu iha atividade Bayu-undan, ne’ebé sei fó kontribuisaun ekonómiku ba Timor-Leste no mantein ami-nia forsa traballu sira iha Timor-Leste no Darwin hodi serbisu kleur liután,” subliña.

Santos iha partisipasaun a’as liu iha korsórsiu ne’ebé reprezenta 43,4% iha operasaun Bayu-undan, no restante pertense ba SK E&S 25%, INPEX 11,4%, Eni 11%, JERA (6,1%), no Tokyo Gas (3,1%).

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here