Formasun revitalizasaun nuu iha Embaixada Indonézia iha Timor-Leste, segunda (31/05). Imajen TATOLI/Natalino Costa

DILI, 31 maiu 2021 (TATOLI)-Embaixada Indonézia iha Timor-Leste hamutuk ho Ministériu Agrikultura no Peska (MAP), fasilita formasaun via virtuál kona-ba revitalizasaun nuu ba joven agrikultór.

“Ohin Embaixada Indonézia no MAP fasilita formasaun pengebangan kelapa/budi daya kelapa, siénsia no teknolojia, partilla hosi Balai Penelitian Tanaman Palma (BalitPalma) iha Sulawesi Norte, Indonézia, ne’ebé fahe esperiénsia no informasaun kona-ba siénsia ba ita-nia joven agrikultór, nune’e bele halo revitalizasaun nuu iha ektare 100 iha munisípiu Viqueque sai modelu agrikultura integradu,Diretór Nasionál Agro-Komérsiu no Kooperasaun Setór Privaduhosi MAP, Fernando  Amaral, informa ba Agência TATOLI, iha edifísiu Embaixada Indonézia, Farol, segunda ne’e.

Notísia relevante: MAP sei revitaliza nuu ektare 100 iha Viqueque

Atividade ne’e partisipa hosi formandu hamutuk kuaze na’in-20, hanesan antigu alunu timor-oan ne’ebé antes ne’e hasai kursu agrikultór iha Israel.

Nia dehan, durante formasaun, péritu sira ko’alia liu kona-ba prepara rai koa’k, kuda, halo manutensaun no halo akompañamentu ba nuu no halo indústria nuu atu prodús mina, masimidar no sabaun.

Iha fatin hanesan, Embaixadór Indonezia ba Timor-Leste, Sahat Sitorus, hateten, formasaun ne’e hanesan parte ida hosi revilitasaun nuu, tanba nota katak Timor-Leste iha área Baucau, Lautém no Viqueque iha poténsia ba nuu.

Tanba ne’e, nia konsidera formasaun ne’e nu’udár oportunide ida ba agrikultór timor-oan atu promove no dezenvolve liuhosi kuda, sosa fini no seluk tan iha Timor-Leste.

“Ohin ne’e hanesan formasaun loron dahuluk via zoom no formasaun ne’e sei kontinua. Ami sei lori péritu sira iha área kultiva nuu mai iha ne’e no agrikutór sira iha ne’e  sei ba Manado, Indonézia, tanba programa ida-ne’e sei  sai hanesan programa annuál,” Diplomata ne’e subliña.

Jornalista: Natalino Costa

Editora: Julia Chatarina

HAKEREK NO HATÁN

Please enter your comment!
Please enter your name here