Diretór Agro-Komérsiu no Kooperasaun Setór Privadu hosi MAP, Fernando Amaral. Imajen TATOLI/Cipriano Colo

DILI, 28 abríl 2021 (TATOLI)—Ministériu Agrikultura Peska (MAP) planeia sei halo revitalizasaun ba nuu tuan sira iha munisípiu Viqueque tanba iha ona alokasaun orsamentu programa ba tinan ne’e.

“Orsamentu tinan ne’e iha verba transferénsia públika, aloka ho montante $650.000, ne’ebé sei uza halo revitalizasaun nuu tuan iha rai ektare 100, iha munisípiu Viqueque,” Diretór Agro-Komérsiu no no Kooperasaun Setór Privadu hosi MAP, Fernado Egidio Amaral, hateten ba Agência TATOLI, kuarta ne’e.

Ba kestaun ne’e, MAP identifika ona fatin ba revitalizasaun iha parte Ratau no Beluli.

“Área sira ne’e iha nuu barak, hanesan iha suku Bahalarawain ne’ebé hanesan produtór nuu  dahuluk no suku ne’ebé maka moris ho nuu. Tanba ne’e, ita-nia alvu iha ne’ebá,” nia akresenta.

Aleinde ne’e, iha tinan 2021 MAP aposta ona atu investe iha indústria nuu.

“Ita hakarak mós opta modelu smart agriculture, ne’ebé hanesan modelu agrikultura integradu, ho nune’e ita buka atu promove,” nia hatutan.

MAP mós planeia atu halo munisípiu Viqueque sai agro-turíztiku tanba hakarak kria ekolojia ne’ebé atrativu ba turizmu komunitáriu ne’ebé bele husik fahi fuik, manu fuik no seluk tan.

Tuir Diretór, planu hirak ne’e sai ona prioridade ba MAP atu implemeta iha tinan ne’e, maibé situsaun COVID-19 impede atividade.

“Planu ne’e tuir loloos realiza ona maibé tanba COVID-19 no impozisaun Serka Sanitária maka ita hadi’a tiha oituan,” Responsável ne’e haktuir.

Jornalista: Natalino Costa

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here