Presidente Institutu Nasionál Seguransa Sosiál (INSS) Longuinhos Armando. Imajen/Egas Cristovão

DILI, 25 maiu 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longinhos Armando Leite, informa to’o horisehik (tersa, 25/04/2021) Institutu Nasionál Seguransa Sosiál (INSS) rekolla ona dadus provizóriu hosi empregadór no traballadór sira ne’ebé rejistu ba programa “apoiu ba empregu” hamutuk 2000-resin.

Notísia Relevante: Funsionáriu públiku balun rejistu ba programa Governu “Apoiu Empregu”

“To’o horisehik ami simu fakultativa ho empreza 2.000-resin. Maibé, ida-ne’e ba Dili de’it seidauk konta ho munisípiu seluk no rejistu online nian. Hosi totál ne’e mai direta rejistu iha INSS,” Longinhos Armando Leite hateten ba jornalista sira, iha nia knaar fatin Caicoli, Dili, kuarta ne’e.

Dadus provizóriu hosi munisípiu ne’ebé tama iha INSS hamutuk 572 maibé la inklui ho Rejiaun Administrativa Espesiál Oé-Cusse Ambeno (RAEOA), munisípiu Aileu no Liquiça tuir informasaun ne’ebé INSS simu mak hamutuk 100 ona.

Iha loron ida, INSS bele simu ema ne’ebé rejistu to’o 250 maibé ne’e ba fakultativu de’it seidauk konta ho empreza. Ba sira-ne’ebé adere ba fakultativu depois simu tiha subsídiu ne’e, nia la’ós atu lakon ona maibé nia tenke adere ona Seguransa Sosiál no bainhira nia adere ona Seguransa Sosiál mak nia mós tenke kontribui ba Seguransa Sosiál.

“Se ita adere ona ba fakultativu mak ita mós sai na’in. Ezemplu, ha’u hanesan patraun mak ha’u mós sai patraun ba ha’u-nia aan. Ba sira-ne’ebé servisu iha empreza ne’e 4% hosi sira-nia saláriu no 6% hosi empregadór mak sei selu,” nia dehan.

Kona-ba fakultativa, nia esplika, fakultativu 10% maihosi nia na’in bainhira ema ne’e hakarak adere entaun sei hahú hosi eskalaun ida to’o sanulu. Esklaun ida iha $6, katak ema ne’e nia rendimentu bele hetan $60.

“Maibé, agora daudaun sira mai rejistu ne’e tenke ho eskalaun ida bainhira hahú mak sente iha kapasidade mak bele aumenta nia eskalaun, maibé nia tenke hateten ba iha INSS,” nia dehan. 

Binhira iha ona kapasidade  atu aumenta eskalaun mak Seguransa Sosiál mós sei bele garante ona nia ba aban bainrua, karik nia idade tama idozu no nia mós sei hetan direitu ne’ebé boot tuir eskalaun ne’ebé iha.

Prezidente INSS informa, programa Governu “apoiu ba empregu” ne’e fulan tolu nian, ne’ebé hahú hosi fulan-marsu to’o fulan-maiu.

“Aban, kinta (27/05) tuku 12:00 sei taka rejistu ba fakultativa sira no ba empreza sei taka aban hotu maibé tuku 17:00 lorokraik mak termina. Tanba atendementu rejistu ba apoiu empregu ne’e fahe dader-lorokraik. Dader fakultativa no lorokraik empreza sira,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here