Komisaun Rekrutamentu FALINTIL-Forsa Defeza Timor-Leste (F-FDTL) halo konferénsia imprensa iha Kuartél Jenerál, Fatuhada, Dili, sábadu (29/05/2021). Imajen Tatoli/Domingos Piedade

DILI, 29 maiu 2021 (TATOLI)-Capitão  Infantaria  no Xefe  Tékniku  Komisaun  Rekrutamentu  FALINTIL-Forsa Defeza Timor-Leste (F-FDTL),  Rui Soares, husu ba kandidatu F-FDTL sira ne’ebé naran sai iha selesaun dokumentu iha vaga F-FDTL ba haree iha kalendáriu ne’ebé  taka  iha kada munisípiu.

Notísia Relevante : Kandidatu 2.400 pasa iha selesaun dokumentu ba vaga F-FDTL 

‘’Ami husu ba kandidatu sira ne’ebé mak naran sai ona iha selesaun dokumentu  iha vaga F-FDTL  tenke ba haree iha  kalendáriu  komisaun  sira taka  iha kada munisípiu  tanba ita hatene agora daudaun situasaun COVID-19 no  joven  balun naran sai iha munisípiu, maibé  la konsege ba  munisípiu  nafatin iha Dili, komisaun  lataka lista naran jerál,  maibé ami taka kada munisípiu. Tanba ne’e  mak iha momentu ne’e  ami esklarese ba públiku atu joven -sira ne’ebé mak  la konsege ba munisípiu bele asiste publikasaun meiu komunikasaun sosiál sira (mídia),”  Rui Soares, haktuir liuhosi konferénsia imprensa iha Kuartél Jenerál F-FDTL, Fatuhada, Dili, sábadu ne’e.

Nia  esplika,  iha ne’e  oráriu ne’ebé  kandidatu sira tenke kumpre haree  mak kada ema tenke haree tuir nia númeru  ne’ebé mak komisaun deside.  Ezemplu iha Munisípiu Dili nian iha kandidatu númeru ida  to’o 120 ninia loron konsentrasaun teste  iha loron 31 maiu  2021 fatin iha Kuartél Jenerál F-FDTL iha  Fatuhada, Dili, tuku 16:00 Otl,  signifika  iha oras ne’e  sira sei konsentra hotu iha Kuartél Jenerál depois mak  komisaun verifika dokumentu sira  ne’ebé presiza antes transporta ba iha Metinaro.

Tuir nia, sira ne’ebé iha naran komesa   hosi 121 to’o 240, sira-nia loron  teste  iha loron  kuarta feira, maibé  sira antes mai aprezenta iha fatin Kuartél Jenerál  iha loron tersa feira, tuku 16:00 Otl, depois mak komisaun transporta ba iha Metinaro.

Nia relata tan katak hosi Dili nian efetivu hamutuk 394 ne’ebé kada kandidatu haree. Tuir ezemplu hosi númeru 241  to’o 360 iha loron  kinta feira iha númeru 361 to’o 394 nia loron  iha sesta feira  entaun husi ne’e tuir kedas kandidatu  Munisípiu Liquiça nian.

Hanesan Liquiça nian numeru ida to’o  86 loron  teste ka loron konsentrasaun  iha loron 03  juñu 2021 iha Kuartél Jenerál, Fatuhada,  tuku 16:00 Otl no loron  teste iha 04 juñu 2021.

Komisaun rekrutamentu  F-FDTL husu ba kandidatu feminina-sira  no mane ida idak mai tenke lori ho  nia sasán hanesan, identifikasaun tantu kartaun eleitorál ka billete identidade  depois tau kedas kalsa  sapatu jinástika  nian  hodi halo teste fíziku nian inklui teste médiku.

“Ba kandidatu sira,   ami hatene katak ita-boot sira  mai tenke tuir swab  tanba swab ne’e nia válidu ba oras 72  depois lori ho rezultadu  teste nian hodi entrega ba iha komisaun rekrutamentu  hodi hatene rezultadu  ne’e iha pozitivu  ka negativu. Se karik rezultadu ne’e  pozitivu númeru kontaktu iha ona formuláriu laran kontaktu ba iha komisaun katak  ha’u ba teste swab maibé rezultadu pozitivu entaun ami konsidera  nafatin   no kumpre loron 14 iha  kuarentena depois swab fila fali rezultadu negativu bele tuir teste,” Rui Soares esplika.

Nia hatutan, ba faze daruak mak nafatin pozitivu, komisaun tolera tanba kumpre hela kuarentena loron  14 no ba faze  datoluk  mak pozitivu nafatin kualifika  tanba komisaun  nia tempu ne’e to’o loron 40. Tanba ne’e husu ba joven-sira ba swab keta laran taridu  se karik iha rezultadu pozitivu foti númeru kontaktu  ho email iha formuláriu  hodi hato’o mai iha komisaun.

Aleinde ne’e komisaun rekrutamentu FFDTL husu ba populasaun timor laran tomak karik iha reklamasaun no asuntu ruma  hakarak hato’o relasiona ho   kandidatu nian    bele liga   ba númeru telefone  77386857 ka 76892274.

Jornalista       : Felicidade Ximenes

Editór             : Francisco Simões

HAKEREK NO HATÁN

Please enter your comment!
Please enter your name here