Brigadeiru Jenerál F-FDTL, Calisto Santos ‘Coliati’ ho Vise Prezidente Komisaun Organizadora Rekrutamentu F-FDTL, Nuno de Carvalho dos Santos, fó-sai rezultadu teste vaga membru F-FDTL. Imajen Tatoli/Eugénio Perera.

DILI, 21 maiu 2021 (TATOLI)—Komisaun Rekrutamentu Konjunta, Ministériu Defeza (MD) ho Komandu FALINTIL Forsa Defeza Timor-Leste (F-FDTL), ofisialmente anunsia naran kandidatu membru F-FDTL foun, hamutuk ema na’in 2.400 mak pasa iha selesaun dokumentu.

Vise Prezidente Komisaun Organizadora Rekrutamentu F-FDTL, Nuno de Carvalho dos Santos, dehan, vaga ne’ebé ekipa fahe iha teritóriu Timor-Leste, hodi halo selesaun ba dokumentu sira, hahú kedan tinan 2020 to’o 21 maiu 2021, hamutuk 3.139 hosi totál formuláriu 12.259, ne’ebé komisaun rekolla iha tinan 2020.

Notísia relevante:Fulan ne’e, lista naran kandidatu F-FDTL sei taka sai iha munisípiu

Hosi ne’e, komisaun halo re-verifikasaun ba kandidadu 3.139, konsege hetan númeru finál, hamutuk 2.400 kompostu hosi feto 341 no mane 2.059.

“Totál formuláriu 12.259 ne’ebé komisaun rekolla iha 2020, maibé, halo hikas re-verifikasaun ba kandidadu 3.139, konsege hetan númeru finál, hamutuk 2.400,” Nuno de Carvalho dos Santos, hateten liu hosi konferénsia imprensa, iha Komandu Jenerál F-FDTL, Fatuhada, sesta ne’e.

Lista naran ne’e, komisaun sei taka iha kuadru avizu Ministériu Defeza Fatuhada Dili, fó-sai iha média imprime no eletrónika no kuadru avizu PNTL ho Administrasaun munisípiu 12 iknlui RAEOA.

Hosi totál kandidatu 2.400 ne’e, iha faze tuir-mai, sira sei kontinua ho faze ezaminasaun médika, teste fízika, psiko-téknika no entrevista.

Iha Faze hirak-ne’e, komisaun sei tais fila-fali kandidatu sira-nia rezultadu ezame no halo re-verifikasaun tan, antes fó-sai naran ba públiku iha Jullu 2021 no sei inkorpora ba instituisaun F-FDTL iha Agosto 2021 hodi tuir treinamentu.

Hosi númeru 2.400, sei tuir teste hotu, ekipa rekurtamentu konjunta sei halo selesaun hodi buka hetan totál efetivu ne’ebé sei inkorpora tama ba Instituisaun F-FDTL hamutuk ema na’in 600.

Tuir oraráriu, Diresaun Saúde Militár no Komisaun sei fó-sai loron ezaminasaun médika, sei hala’o iha loron 1 juñu 2021, teste fíziku sei hala’o iha 2 juñu 2021 tuku 06:00 otl, simultamente to’o jullu.

Teste fízika sei aplika ba kandidatu ne’ebé pasa ona iha ezame médika no ba kandidatu ne’ebé la liu, automatikamente sei esklui ka elimina.

Komisaun rekurtamentu mós alerta ba kandidatu-sira ne’ebé naran taka-sai iha tempu besik, tenki ba konsentra hotu iha Kuartél Jenerál F-FDTL Fatuhada iha tuku 04:30 madrugada no loron 02 juña 2021.

Komisaun mós sei fasilita transporte atu tula kandidatu-sira ba tuir ezame médika, fízika no seluk-tan iha Sentru Formasaun Komandante Nicolau Lobato, Metinaro, Dili.

Diretór Nuno de Carvalho dos Santos husu ba kandidatu-sira ne’ebé bainhira naran taka-sai no sei hela iha munisípiu, tenki hala’o ona vizaun mai Dili, tanba tuir ajenda komisaun rekurtamentu, Dili sai nu’udár munisípiu primeiru ba prosesu teste no tuir fali mak munisípiu Liquiça, Ermera, Aileu no seluk tan.

Ba kandidatu sira ne’ebé atu mai tuir teste, tenki kumpre mós regra Organizasaun Mundiál Saúde  (OMS) no Ministériu Saúde (MS), hodi tuir teste swab no vasina, atu proteze an hosi ameasa COVID-19.

Kandidatu-sira ne’ebé tuir ona teste swab no vasina, tenki aprezenta mós kartaun no dokumentu swab ba komisaun.

Iha fatin hanesan, Brigadeiru Jenerál F-FDTL, Calisto Santos ‘Coliati’ dehan, prosesu rekrutamentu ne’e la’o tarde, tanba problema mundiál COVID-19 no orsamentu estadu.

Nia husu ba joven-sira ne’ebé pasa iha selesaun dokumentu, atu prepara mentalidade no fíziku hodi hasoru teste tuir-mai.

“Sira ne’ebé pasa iha prosesu selesaun dokumentu, katak, sira ne’ebé prienxe kritériu ne’ebé komisaun fó-sai ho númeru apuradu,” nia hateten.

Coliati dehan, totál efetivu ne’ebé sei inkorpora hamutuk 600. Hosi númeru selesionadu iha selesaun dokumentu, ninia formula, atu hetan kadete 600 maka kandidatu na’in haat (4) sei hadau vaga ida ou vaga ida kandidatu na’in haat mak sei kompete.

“Formula ne’e hatudu mai ita katak, prosesu ne’e kompetitivu, la’o tuir regra no intensaun polítika komandu, komisaun la halo favoritizmu,” nia subliña.

Maski rekrutamentu ne’e fó prioridade ba veteranu, rezisténsia no luta na’in-sira nia oan, maibé Komandu F-FDTL rasik fó orientasaun ba komisaun katak, hotu-hotu tenki la’o tuir kritériu ne’ebé estabelese ona.

Jornalista: Eugénio Pereira

Editór: Cipriano Colo

2 KOMENTÁRIU

HAKEREK NO HATÁN

Please enter your comment!
Please enter your name here