Administradór Munisípiu Manufahi, Arantes Isaac Sarmento. Imajen Tatoli/Dok

DILI, 28 maiu 2021 (TATOLI)—Membru Ofisiál Polísia Suku (OPS) na’in-29 ho lideransa komunitáriu na’in-29 Munisípiu Manufahi, sesta ne’e, iha Manufahi, tuir sensibilizasaun kona-ba evolusaun no prevensaun surtu COVID-19.

Notísia Relevante : Kombate COVID-19, Manufahi estabelese ekipa task force

Administradór Munisípiu Manufahi, Arantes Isaac Sarmento, informa munisípiu Manufahi parseria ho  internasionál Water aid, Give one Asia Grupu Luta Ba Futuru no Asosiasaun Servisu Redusaun Risku Dezastre Timor-Leste (ASERD TL) hamutuk ho parte Saúde Munisípiu Manufahi nian, realiza atividade sensibilizasaun ne’e ba lideransa komunitária no OPS ne’e tanba sira mak durante besik liu komunidade.

“Matéria ne’ebé ko’alia hosi sensibilizasaun ne’e mak haree istória ka lala’ok COVID-19 nian ne’e hahú mosu hosi ne’ebé no nia reasaun sira ne’e hanusá no oinsá mak atu prevene,” Arantes Isaac Sarmento, informa ba Agência Tatoli via telefónika, sesta ne’e.

Nia dehan,  presiza foti komisaun publika ba Munisípiu Manufahi ninian, atu halo prevensaun ba COVID-19, tanba  hatene katak ko’alia ba prevensaun públika Governu mesak de’it mós labele  tanba ne’e presiza kolaborasaun entidade hotu nian atu hlao sensibilizasaun ba povu kona-ba oinsá halo prevensaun ba surtu COVID-19.

Nia hatutan, aleinde parseiru-sira hamutuk ho parte saúde fó informasaun evolusaun COVID-19 nian ba komunidade, iha biban ne’e mós fahe informasaun kona-ba vasina AstraZeneca, tanba daudaun ne’e komunidade barak mak seidauk hatene didi’ak funsaun hosi vasina ne’e rasik, no liuliu lia falsu ne’ebé iha mídia sosiál halo komunidade ta’uk vasina.

“Vasina AstraZeneca iha Munisípiu Manufahi etapa dahuluk ba ekipa liña frente simu tiha ona, maibé ba etapa daruak nian seidauk, entaun vasina to’o mai, ita-nia komunidade atu simu ita fó uluk informasaun ba sira, nune’e sira labele pániku ka ta’uk atu simu vasina refere,” Arantes Isaac Sarmento hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here