Administradór Munisípiu Manufahi, Arantes Isaac Sarmento. Imajen/Espesiál

DILI, 10 maiu 2021 (TATOLI)-Administradór Munisípiu Manufahi, Arantes Isaac Sarmento hateten, molok Governu aplika serka sanitária ba Manfuhahi, sira-nia parte estabelese tiha ona  ekipa task force COVID-19 hodi halo sosializasaun prevensaun COVID-19 nian ba abitante-sira.

“Ha’u atu hateten de’it katak antes ami-nia munisípiu tama iha zona aplikasaun serka sanitária, ami prontu aplika de’it tanba antes ne’e ami kria ona task force ida ho naran Kontrolu, Prevensaun, Kombate no Atendimentu (KPKA) hodi servisu oinsá atu kombate COVID—19 iha ami-nia munisípiu,” Arantes Isaac Sarmento haktuir  ba Agência Tatoli liuhosi telefónika hosi Manufahi, segunda ne’e.

Nia hatutan, grupu KPKA harii la’ós hafoin Governu deside Munisípiu Manufahi tama hotu serka sanitária, maibé harii dezde Timor-Leste aplika Estadu Emerjénsia dahuluk to’o mai agora. Tanba ne’e, nia dehan, agora Munisípiu Manufahi mós tama ona serka sanitária, loroloron sira ezekuta de’it planu ne’ebé harii ona, hanesan halo kontrolu maka’as ba fronteira Manufahi nian tomak ne’ebé liga ba munisípiu sira seluk, halo sosializasaun ba abitante-sira hodi tama-sai bairru-sira kona-ba oinsá komunidade bele prevene-an hosi COVID-19 hosi kumpre protokolu saúde públiku.

“Atu kombate mak ami estabelese  fatin kuarentena no izolamentu, ne’ebé deteta abitante ruma pozitivu hatama ba izolamentu. Maibé Munisípiu Manufahi médiku sira aleinde haree COVID-19 kontinua mós kontinua fó sosializasaun ba moras sira seluk, hanesan malária no seluk tan,” nia hateten.

Nia afirma, daudaun ne’e Munisípiu Manufahi rasik bainhira Governu deside aplika serka sanitaria la admite nia abitante sira ka sé de’it atu halo viajen ilegál ba tama área jurisdisaun Manufahi nian.

“Pontu entrada-sira ema atu tama ka sai tenke iha karta autorizasaun hosi Sentru Integradu Jestaun Krize (CIGC-sigla portugés), maibé laiha autorizasaun karta hosi CIGC mak la admite abitante-sira tama Munisípiu Manufahi,”  Arantes Isaac Sarmento hateten.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here