iklan

EKONOMIA, HEADLINE

MOP anunsia ona rezultadu konkursu estrada rurál Dili no Viqueque

MOP anunsia ona rezultadu konkursu estrada rurál Dili no Viqueque

Kondisaun estrada rurál eis Kodim Maliana bá Colégio Maliana, iha 14 dezembru 2020. Imajen TATOLI/António Gonçalves

DILI, 28 maiu 2021 (TATOLI)–Ministériu Obra Públika (MOP) liuhosi Diresaun Nasionál Aprovizionamentu (DNA) hahú anunsia empreza lokál manan-na’in konkursu públiku projetu estrada rurál iha munisípiu Viqueque no Dili.

Ministru Obra Públika, Salvador Eugênio Soares dos Reis Pires, hateten, projetu estrada rurál pakote 44 liu ona prosesu avaliasaun téknika iha Komisaun Administrativa Fundu Infraestrutura (KAFI) no ikus mai Komisaun Nasionál Aprovizionamentu (CNA, sigla portugés) loke konkursu públiku.

“Ita iha pakote 60 mak iha liña ministériu, ne’ebé kuaze munisípiu rua hanesan Viqueque no Dili  mak finaliza no anunsia ona rezultadu, enkuantu restu iha prosesu avaliasaun,” Ministru Salvador hateten foin lalais ne’e iha Pálasiu Governu.

Notísia relevante: MOP avalia ona dokumentu konkursu públiku estrada rurál munisípiu hitu

Empreza ne’ebé sai manan-na’in ba konkursu públiku iha munisípiu Dili mak hanesan Titiso Luoro Unip. Lda ho númeru konkursu MOP/CD/NCB-R/21022, ba projetu loke estrada rurál  iha Hera to’o Liurai ho kustu obra $173.960,80 no Lonaca Unip. Lda ho númeru konkursu MOP/CD/NCB-R/21023, ne’ebé kontinua obra estrada rurál iha Hera to’o Liurai ho kustu  $225.714,76.

Enkuntu, empreza sira ne’ebé sai manan-na’in ba projetu estrada rurál iha munisípiu Viqueque hanesan Manoko Unip.Lda ho númeru konkursu MOP/CD/NCB/21024, ne’ebé ho área projetu  Luihono to’o Uaguia ho kustu $474.365,56 no kompañia Costa Key Unip. Lda ho númeru Konkursu  MOP/CD/RFQ/21010, ne’ebé ho área projetu iha Ossu to’o Nahareka.

Enkuantu kona-ba estrada munisipál, Ministru Salvador dehan, ezbosu finál dezeñu detalladu pakote estrada munisipál hamutuk 12 no ponte pakote 10.

“Iha ezbosu finál ba dezeñu detalladu finál, maibé ita serbisu hamutuk ho Ministériu Planu no Ordenamentu (MPO) no Ajénsia Dezenvovlimentu Nasionál (ADN) atu halo verifikasaun lalais, nune’e ita bele avansa ba faze implementasaun iha tinan ne’e,” nia akresenta.

Nia dehan, pakote hirak ne’e depende ba prosesu burokrasia iha sistema Governu tanba MOP labele implementa projetu independetemente molok konkursu públiku no verfikasaun, ne’ebé prosesu ne’e bele rekere tempu atubele finaliza.

Hafoin halo konstrusaun, MOP liuhosi DNA finaliza ona evaluasaun téknika no finansiál ba empreza lokál sira ne’ebé kompete iha konkursu públiku ba projetu estrada rurál iha munisípiu hitu hanesan Baucau, Ainaro, Manatuto, Dili, Manufahi, Laútem no Viqueque.

Totál projetu munisípiu hitu hamutuk pakote 67, ne’ebé DNA konsege finaliza evaluasaun dokumentu tékniku no finansiál ba kompaña lokál hamutuk 60-resin ne’ebé kompete pakote estrada rurál hamutuk 37.

Nune’e, MOP-DNA sei lansa konkursu públiku ba munisípiu lima seluk hanesan munisípiu Aileu, Ermera, Liquiçá, Covalima no Bobonaro, ho totál pakote estrada rurál hamutuk 30 hafoin situasaun serka sanitária.

Jornalista: Florêncio Miranda Ximenes

Editora: Julia Chatarina

iklan
iklan

Leave a Reply

iklan
error: Content is protected !!