Diretór Nasionál Aprovizionamentu, Quintiliano A. Belo. Imajen/MOP

DILI, 16 abríl 2021 (TATOLI)—Ministériu Obra Públika (MOP) liuhosi Diresaun Nasionál Aprovizionamentu (DNA, sigla portugés) hahú avalia dokumentu konkursu públiku ba estrada rurál (R4D, sigla inglés) iha munisípiu hitu.

Diretór Nasionál Aprovizionamentu hosi MOP, Quintiliano Afonso Belo, hateten daudaun ekipa diresaun avalia dokumentu kompañia ne’ebé konkorre.

“Ami hahú avaliasaun dokumentu konkursu estrada públiku iha munisípiu Baucau, Ainaro, Manatuto, Dili, Manufahi, Lautém no Viqueque,”Diretór Quitiliano hateten ba Agência TATOLI iha ninia knaar fatin, sesta ne’e.

Avaliasaun hosi Baucau, Ainaro no Manatuto lidera hosi, Xefe Departamentu Jestaun Kontratu, Deoniso Gutteres, ne’ebé konklui ona  avaliasaun no agora iha ona faze finál aprezentasaun relatóriu hodi hetan aprovasaun.

Governu aloka orsamentu iha liña ministériu ba reabilitasaun no konstrusaun estrada rurál hamutuk pakote 18 no sei iha mós verba hosi fundu infrastrutura ne’ebé nia prosesu tomak Komisaun Nasionál Aprovizionamentu (CNA, sigla portugés) mak sei lidera.

Rezultadu konkursu públiku ne’e, hafoin DNA hetan verifikasaun prévia ba dezeñu no Bill of Quantity (BoQ) ne’ebé halo hosi Ajénsia Dezenvolvimentu Nasionál (ADN).

“Felizmente verifikasaun sira ba estrada rurál hosi ADN ba pakote hotu aprova  no livru 3A konklui ona, ne’ebé mai hosi fundu liña ministériu no hela iha DNA-MOP inklui hosi fundu infraestrutura. DNA enkamiña direta ba CNA hodi hahú halo prosesu aprovizionamentu,” nia akresenta.

Aleinde ne’e, ba munisípiu tolu seluk seidauk halo ba dokumentu ka prosposta hosi empreza sira DNA foin simu iha loron 15 abríl.

Nune’e, Diretór ne’e dehan, ekipa organiza hela no hahú segunda ba oin ekipa kontinua ho avaliasaun prosposta tékniku hodi halo relatóriu atu hetan aprovasaun hosi Ministru Obra Públiku, Salvador Eugênio Soares dos Reis Pires ,tuir lei no regra.

Totál empreza lokál ne’ebé partisipa iha konkursu ne’e ba kada pokote mínimu empreza na’in-haat no másimu na’in hitu to’o 10.

Ba pakote estrada rurál hamutuk 13 sei halo iha munisípiu Viqueque, Lautém no Manufahi inkluindu Dili hamutuk pakote rua.

”Totál  estrada rurál  ne’ebé sei halo reablitasaun no manutensaun iha territóriu laran tomak iha tinan ne’e hamutuk pakote 136 ne’ebé verifikadu husi ADN. Hosi totál ne’e fundu mai hosi MOP rasik pakote 67 no fundu infrastrutura hamutuk pakote 69,” Diretór Nasionál informa.

Aleinde ne’e, Ministru Salvador fó ona instrusaun ba DNA atu aselera prosesu, nune’e kontratór sira bele mobiliza no ezekuta obra tuir tempu ne’ebé determina ona.

“Ita-nia objetivu mak halo avaliasaun atu iha tinan ne’e hahú konstrusaun hodi fasilita ita-nia komunidade sira área rurál bele asesu dalan ho lalais,” nia akresenta.

Jornalista: Florêncio Miranda Ximenes

Editora: Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here