Adjuntu Komisariu CAC ba Asuntu Prevensaun no Sensibilizasaun, Luis de Oliveira Sampaio. Imajen Tatoli/Egas Cristovão.

DILI, 06 maiu 2021 (TATOLI)—Komisaun Anti Korrupsaun (CAC-siglá portugés) ho Ministériu Solidariedade Sosiál no Inkluzaun (MSSI), fó ultimatum ba benefisiáriu agregadu familiár la elizível, iha implemetasaun Estadu emerjénsia dahuluk, atu devolve subsídiu $200 ba Governu, to’o fulan juñu tinan ne’e.

Adjuntu Komisáriu CAC ba Asuntu Prevensaun no Sensibilizasaun, Luis Oliveira Sampaio hateten, tuir lei, benefisiáriu hanesan funsionáriu ne’ebé saláriu liu $500 laiha direitu ba subsídiu ne’e, no tuir loloos iha sirkulár ne’ebé hasai to’o marsu tinan ne’e, sira tenke devolve. Maibé, ho implementasaun serka sanitária no konfinamentu obrigatóriu no mós dezastre naturál, nune’e prolonga tan to’o juñu.

Notisia relevante:Benefisiáriu 148 tenke devolve subsídiu agregadu familiár

CAC rasik, inisia koordenasaun ho MSSI  no Ministériu Finansa, kria ona konta bankária ketak, nune’e  fasilita benefisiáriu-sira bele devolve direta hosi konta ne’e.

“Prazu ne’ebé determina, bainhira benefisiáriu-sira la koopera hodi devolve osan ne’ebé simu ona, CAC sei foti medida represivu ka investigasaun atu submete tuir regra prosesuál ne’ebé vigór,” Luis Oliveira Sampaio  hateten ba jornalista Agéncia Tatoli, iha nia kna’ar fatin Praia dos Coqueiros, Dili, kinta ne’e.

Tuir dadus hosi MSSI, iha benefisiáriu na’in 18 mak voluntariamente  ho konsiénsia-rasik entrega ona subsídiu ne’ebé sira simu ona, tanba la prienxe kritéria.

Antes ne’e iha 05 agostu 2020, ekipa konjunta ne’ebé kompostu hosi   CAC, Provedoria Direitu Humanu no  Justiça (PDHJ), Inspesaun Jerál Estadu (IJE) no Komisaun Funsaun Públika (CFP), fó-sai rezultadu monitorizasaun katak, benefisiáriu hamutuk 148 ho totál $29.600.00 ne’ebé simu ona subsídiu agredadu familíar hosi Governu, atu devolve tanba la prienxe kritéria.

Kritéria ne’ebé la prienxidu hatuur iha dekretu lei apoiu monetáriu ba agregadu familiár tuir lei númeru 15/2020 ka nu’udár funsionáriu ne’ebé ho sálariu liu $500.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here