Ema deskoñesidu na’in-rua hana Nívio Carvalho ho rama ambon iha matan-fukun. Imajen/Faceebok.

DILI, 28 maiu 2021 (TATOLI)—Ema deskoñesidu na’in-rua lori rama ambon, hana kanek Nívio Carvalho iha matan-fukun parte kuana, iha rezidénsia Baucau Sentrál, suku Bahu, postu administrativu Baucau Vila, Munisípiu Baucau.

Kronologia kazu ne’e, akontese iha kinta (27/05) tuku 18:00 otl, bainhira vítima tuur-hela iha ninia-uma oin, derrepente ema na’in deskoñesidu na’in-rua taka oin metin ho motór ida la’o neneik, hodi lori rama ambon hana kona kedan vítima, rezulta rama ambon tama borus vitima ninia mata-fukun.

Notísia relevante:PNTL detein LS tanba ameasa no husu osan ba feto

Hafoin hana kanek, vítima monu no suspeitu deskoñesidu na’in-rua halai liu no parte família lori kedan vitima ba Ospitál Baucau, hodi kontinua transporta mai Sentru Saúde Vera Cruz, Dili, atu hein prosesu operasaun hasai rama ambon.

Komandante PNTL Munisípiu Baucau, Superintendente Xefe, Armando Monteiro orienta kedan ekipa investigasaun tuun ona ba terrenu, hodi rekolla informasaun no buka-tuir autór deskoñesidu na’in-rua ne’e.

Armando Monteiro mós orienta ekipa Serbisu Informasaun Polísia (SIP) no apoiu hosi autoridade suku, membru Konsellu Polisiamentu Komunitária (KPK), hodi buka-tuir paradeiru suspeitu deskoñesidu na’in-rua.

Daudaun-ne’e vítima hala’o hela tratamentu saúde iha Sentru Saúde Vera Cruz, Dili no parte família buka apoiu hosi abitante-sira atu bele apoiu doasaun raan ho tiu B, hodi ajuda vítima bele hein to’o prosesu operasaun hasai rama-ambon.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here