Segundu Komandante Polisia Munisípiu Dili, Superintendente Asistente Polisia, Euclides Belo. Imajen/Eugénio Pereira

DILI, 27 maiu 2021 (TATOLI)—Polísia Nasionál Timor Leste (PNTL) munisípiu Dili, eskuadra Cristo Rei, detein joven mane ida ho inisiál LS, ne’ebé halo ameasa no husu osan ba feto ida ho inisiál FdCS (51) iha kuarta (26/05) lorokraik.

Segundu Komandante PNTL Munisipiu Dili, Superintendente Euclides Belo, informa PNTL detein suspeitu  ho asaun flagrante delito iha área Dolok-oan Cristo Rei, tanba suspeitu lori motór ho xapa matríkula 7995, ba tula FdCS iha rezidénsia área postu administrativu Na’in-Feto, hodi lori ba área Dolok-oan ho intensaun la’o pasear.

Notísia relevante:Kazu UNPAZ, defeza sei hatama rekursu kontra TDD

Bainhira to’o iha Dolok-oan, suspeitu obriga hodi husu osan ba FdCS maibé la fó, nune’e, suspeitu husik hela FdCS mesak, ikus-mai FdCS hato’o keixa ba polísia.

“Suspeitu ho inisiál LS daudaun-ne’e detein hela iha sela polísia, hodi submete ba prosesu investigasaun,” Euclides Belo hateten ba jornalista-sira iha Komandu PNTL, Caicoli, kinta ne’e.

PNTL mós rekolla ona dadus hosi FdCS, hodi konta kronolojia kona-bá hahalok suspeitu ba tula FdCS to’o ameasa hodi husu osan.

PNTL konsidera suspeitu komete krime sekuestru iha artigu 160 kódiku penál no daudaun-ne’e suspeitu sei detein hela iha sela polísia Dili durante oras 72, hodi hein prosesu aprezentasaun kazu ba Ministériu Públiku (MP).

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here