Atoni-oan sira submete ba teste swab molok fila ba Oé-Cusse. Imajen Tatoli/Arminda Fonseca

DILI, 28 maiu 2021 (TATOLI)-Atoni-oan na’in-90 ne’ebé durante ne’e okupa edifísiu sentrál Zona Espesiál Ekonomia Sosiál Merkadu (ZEESM) iha Farol, Dili, sesta ne’e, submete ba teste  swab molok fila ba sira ida-idak nia knua iha Rejiaun Administrativa Espesiál Oé-Cusse Ambeno (RAEOA).

Notísia Relevante : Semana oin, Autoridade RAEOA transporta Atoni-oan hamutuk 80 bá Oé-cusse

Koordenadór Gabinete ZEESM, Nilton Pereira,  hateten teste swab ne’e tanba Autoridade RAEOA iha alternativu atu transporta abitante-sira faze dahuluk ho ema na’in-80, tanba ne’e ekipa hosi Autoridade RAEOA koordena ho Sentru Integradu Jestaun Krize (CIGC-sigla portugés) haruka ekipa saúde pillar tolu halo teste swab ba sira molok sira fila ba Ambeno.

“Hanesan ita hotu hatene katak loron hirak liubá ita-nia Atoni-oan lubuk ida mai okupa edifísiu sentrál ZEEMS, ezije hakarak fila, nune’e ami mai halo aproximasaun ho sira hodi hamamuk fatin no ohin sira  halo teste swab hodi hein rezultadu negativu bele fila ba RAOEA,”   Nilton Pereira, haktuir  ba Agência Tatoli iha edifísiu sentrál ZEEMS, Farol, Dili.

Nia esplika, faze dahuluk nian sei transporta ema na’in-80, maibé ohin teste ba  na’in-90 ho razaun karik balu pozitivu entaun troka fali negativu ne’e ba no sira ne’ebé pozitivu tenke kumpre protokolu Organizasaun Mundiál Saúde (OMS) hodi submete ba izolamentu.

Atoni-oan sira ne’ebé teste swab ne’e nia rezultadu sei fó sai iha domingu (30/05). Nune’e, loron tuir mai, segunda, bele transporta ona sira ne’ebé ho rezultadu negativu hosi COVID-19 ba RAEOA.

Lourdes Maia Barreto, antoni-oan ne’ebé submete ona ba teste suwab ne’e  hateten, kontente tanba Prezidente Autoridade RAEOA bele responde ona sira-nia preokupasaun atu fasilita sira fila ba sira-nia rai moris fatin.

“Ha’u kontente tebes, maske antes ne’e triste tebes tanba ami hasai swab no simu tan vasina AstraZeneca, maibé difisil tebes atu fila. Agora iha ona desizaun pozitivu ba mai bele fila ba RAEOA,” nia hateten.

Jornalista           : Arminda Fonseca

Editór                 : Francisco Simões

HAKEREK NO HATÁN

Please enter your comment!
Please enter your name here