Reprezentante hosi ZEESM,TL koordena ho Atoni-oan ne’ebé okupa edifísiu sentrál iha Farol, Dili, tersa (25/05). Imajen/Natalino Costa

DILI, 25 maiu 2021 (TATOLI)—Autoridade Rejiaun Espesiál Oé-cusse Ambeno (RAEOA) deside atu transporta Atoni-oan fazeadamente hosi Dili bá Oé-cusse hahú semana oin.

“Autoridade iha alternativu hodi solusiona ita-nia ema sira, ne’ebé faze dahuluk transporta ita-nian ema 80 ne’ebé prenxe ona rekezitu mak sei halo viajen,” Koordenadór Gabinete Zona Ekonomia Espesiál  Sosiál Merkadu, Timor-Leste (ZEESM,TL), Nilton Pereira, informa iha edifísiu Farol, tersa ne’e.

Durante semana ida ona, Atoni-oan lubun okupa edifísiu sentrál ZEESM,TL tanba tuir sira hasoru situasaun defisíl iha Dili, tanba ne’e hakarak fila ba sira-nia rai.

Komunidade ne’e kompostu hosi estudante, traballadór iha empreza privada, fila liman no serbisu seluk tan.

Notísia relevante: Ekipa RAEOA-CIGC sei koordena transporta Atoni-oan fazeadamente bá Oé-cusse

“Sira sei arranka iha segunda oin, no sei tuir teste swab iha kinta semana ne’e. Kuandu  balun  pozitivu sei la arranka, tanba ne’e protokolu saúde no sira ne’ebé negativu sei bá Oé-cusse maibé sei hela iha kuarentena durante loron 14 tanba Autoridade RAEOA hakarak livre hosi moras COVID-19,” nia akresenta.

Atoni-oan ne’ebé atu aranka iha faze dahuluk kompostu hosi estudante no inan-aman.

Enkuantu, iha faze daruak, sei transporta Atoni-oan, maibé sei haree ba kapasidade kuarentena iha Oé-cusse.

Entertantu, Atoni-oan ne’ebé hakarak fila bá Oé-cusse hamutuk 500 resin.

Jornalista: Natalino Costa

Editora: Julia Chatarina 

HAKEREK NO HATÁN

Please enter your comment!
Please enter your name here