Logotipu TDD. Imajen Tatoli/Dok.

DILI, 27 maiu 2021 (TATOLI)—Tribunál Distritál Dili (TDD), kinta ne’e, hala’o julgamentu ba arguida Maria Anabela Sávio, atuál membru Parlamentu Nasionál (PN).

TDD notifika arguida tanba deskonfia pratika krime pekulatu ka enxe señas kombustível ho kupón Estadu ba karreta privadu.

Notísia relevante:PN hasai ona imunidade ba Deputada Anabela Sávio

Faktu akuzasaun hosi Ministériu Públiku (MP), ne’ebé mak  Tribunál lee-sai katak,  iha 04 abríl 2019, pedidu fiskalizasaun ba munisípiu Lautém hosi loron 09 to’o 12 abríl 2019, hosi Vise-Prezidente komisaun E no husu mós apoiu perdiem, transporte operasionál ho kombustível no hetan aprovasaun.

Iha 09 abríl 2019, arguidu ho inisiál DJ simu orientasaun hosi arguida Maria Anabela Sávio, atu enxe kombustível ba nia-la’en ho inisiál VDQ nia-karreta privadu ho númeru matríkula 21-199 TLS uza señas kombustível Estadu, ne’ebé atribui ba karreta MP 88-37 sein iha autorizasaun.

Iha loron hanesan, mais ou menus tuku 17:40 otl, bazeia ba arguida-nia orientasaun, arguidu DJ hanesan motorista imediatu kondúz arguida nia-la’en nia-karreta privadu ho númeru matrikula 21-199 ba enxe kombustível ho señas Estadu 2.A.númeru seriál 000003 ho valór $20. no B. númeru seriál 000804 ho valór $20, iha estasaun abastesimentu kombustível Lafaek Oil and Gas Comoro.

Bainhira arguidu DJ  enxe  mina ba arguida Maria Anabela Sávio nia-laen nia-kareta privadu hotu, no atu selu ho señas kombustível maka ekipa hosi Komisaun Anti-Korrupsaun (CAC), imediatu halo intervensaun, hodi husu karta autorizasaun, maibé laiha autorizasaun, nune’e CAC prende señas kombustível.

Iha 10 abríl 2019, hafoin CAC prende tiha señas kombustível, maka arguida liu hosi Komisaun E foin halo pedidu apoiu kombustível no parte administrasaun Parlamentu Nasionál (PN), foin halo rekomendasaun atu enxe mina ba karreta privadu.

Iha loron hanesan, arguida mós liu hosi komisaun infraestrutura halo pedidu manutensaun ba karreta Parlamentu MP 88-37.

Maibé, iha loron ne’e mós karreta Parlamentu MP 88-37 ne’ebé distribui ba arguida di’ak hela, nune’e arguida hamutuk ho tékniku-sira hosi Parlamentu Nasionál, uza ba tiha ona hodi halo fiskalizasaun iha Lautém.

Konsekuénsia nesesária no direta hosi arguida Maria Anabela Sávio, ho arguidu DJ nia konduta, Estadu hetan prejuizu osan ho montante $40.

Arguida Maria Anabela Sávio  hanesan deputada PN hatene momós katak, kupón mina ne’ebé entrega ba nia, no rai iha nia pose, atu enxe ba karreta MP 88-37, maibé nia haruka kondutór arguidu DJ, hodi enxe nia-laen nia karreta privadu ho númeru matríkula 21-199 TLS sein iha autorizasaun hosi PN.

Arguidu DJ hanesan kondutór Parlamentu Nasionál hatene momós katak, señas kombustível PN ne’ebé hakerek tiha ona nia númeru matríkula 88-37 enxe de’it ba karreta ne’e maibé, arguidu uza señas kombustível karreta PN ba enxe fali arguida nia-laen VDQ nia karreta privadu.

Arguida ho arguidu  halo ho forma livre, deliberada no konsiente katak hahalok sira ne’e kontra lei, maibé sira atua nafatin.

Ho nune’e, arguida Maria Anabela Sávio no DJ, hanesan ko-autór materiál ho forma konsumada, komete krime pekulatu, ne’ebé previstu iha artigu 295, hosi kódigu penál Timor-Leste.

Liu hosi audiénsia julgamentu ne’e, arguida Maria Anabela Sávio, hateten akuzasaun sira-ne’e  balun loos no balun la loos.

La loos tanba karreta privadu ne’e baibain nu’udár membru PN, uza hodi hala’o serbisu PN nian, bainhira karreta ne’ebé PN atribui kondisaun ladi’ak, bele utiliza mós karreta privadu ne’e hodi fasilita hala’o fiskalizasaun iha baze.

“Tanba ne’e, karreta privadu ne’e rejistu mós iha PN desde kuarta lejislatura, hodi fasilita serbisu PN, hanesan deputada. Nune’e, momentu ne’ebá antes atu halo fiskalizasaun, ha’u hatama pedidu ba komisaun iha autorizasaun eskrita hosi sekretária jerál PN,’’ Maria Anabela Sávio, hateten iha sala audiénsia TDD, kinta ne’e.

Nia hatutan, regra PN nian autoriza bele utiliza señas kombustível ba karreta privadu ho nesesidade hala’o fiskalizasaun ruma iha baze, tanba ne’e nia parte antes halo uluk pedidu ba parte komisaun hodi hato’o ba sekretáriu jerál PN, hetan autorizasaun formál ka eskrita.

Nia mós sita kupón señas ne’ebé hetan iha momentu ne’ebá atu uza ba fiskalizasaun ho valór $200 no $40 mak uza ba karreta privadu, restu enxe ba karreta PN.

“Tanba ne’e, momentu ne’eba ha’u husu ba motorista katak, kareta rua ne’ebé atribui ba ha’u, ida ne’ebé mak di’ak liu, nune’e motorista dehan karreta privadu ne’e mak di’ak liu atu bele uza, tanba ne’e haruka uza kupón señas konbustível ne’ebé iha ba karreta privadu, hodi bele ba hala’o fiskalizasaun,’’ nia haktuir.

To’o loron atu ba halo fiskalizasaun, maski karreta privadu ne’e uza ona señas, maibé la konsege utiliza ba halo fiskalizasaun.

“Momentu ne’e motorista dehan fila-fali mai ha’u katak, bainhira ba halo fiskalizasaun la’o ekipa, orsida iha dalan duni-malu ladún di’ak tanba karreta ninia guarda-soke iha oin ladi’ak, tanba seidauk solda metin, entaun karreta ne’e labele uza,’’ nia haktuir tan.

Rona tiha deklarasaun ne’e, Tribunál deside adia fila-fali julgamentu ne’e ba loron seluk, hodi rona parte balun.

Audiénsia julgamentu ne’e prezide hosi juiz singulár, José Gonçalves, Ministériu Públiku reprezenta hosi prokuradór, Jacinto Babo no arguida ho arguidu hetan asisténsia legál hosi advogadu privadu, Arlindo Sanches.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here