iklan

NASIONÁL, JUSTISA, HEADLINE, POLÍTIKA

PN hasai ona imunidade ba Deputada Anabela Sávio

PN hasai ona imunidade ba Deputada Anabela Sávio

Deputada Maria Anabela Sávio. Imajen/Espesiál.

DILI, 17 maiu 2021 (TATOLI)—Parlamentu Nasionál (PN), segunda ne’e hasai ona imunidade ba Deputada Maria Anabela Sávio, hodi hatán ba Tribunál Distritál Dili (TDD) nu’udar arguida iha loron 27 maiu semana oin.

Prosesu votasaun ba levantamentu imunidade ne’e liuhosi eskrutíniu sekretu ne’e a-favór 50, kontra 3, abstensaun 1, votu branco 1 no votu nulu 1.

Notísia Relevante: PN hasai ona imunidade ba Deputada Anabela Sávio

“Nune’e, distinta Deputada Anabela Sávio ninia imunidade levantada (hasai levantamentu),” Prezidente Parlamentu Nasionál, Deputadu Aniceto Longuinhos Guterres Lopes, anunsia liuhosi plenária.

Entretantu arguida Deputada Maria Anabela Sávio, prontu koopera ho justisa tanba sidadaun hotu-hotu iha lei nia okos.

“Ha’u ba nu’udar arguida, ha’u prontu no koopera tanba iha ita-nia nasaun ne’e lei mak boot liu ba ema hotu-hotu, laiha ema-ida mak boot liu fali lei. Ne’e kona-ba kazu akuza kupon ne’ebé akontese iha 2019 iha estasaun kombustível Lafaek,” Deputada hosi bankada Fretilin ne’e hateten.

Tuir akuzasaun Ministériu Públiku nian katak, iha loron 09 abríl 2019, arguidu ho inisiál DJ simu orientasaun hosi Maria Anabela Sávio atu ense kombustível ba nia la’en ho inisiál VDQ nia karreta privadu ho númeru matríkula 21-199 TLS uza seña (senhas) kombustível Estadu ne’ebé atribui ba karreta MP 88-37 sein iha autorizasaun.

Bainhira arguidu DJ ense mina ba arguida Maria Anabela Sávio nia la’en nia karreta privadu hotu no atu selu ho seña kombustível mak ekipa Komisaun Antí Korrupsaun (CAC-sigla portugés) imediata halo intervensaun hodi husu karta autorizasaun maibé laiha karta autorizasaun, nune’e KAK prende seña kombustível.

Ho nune’e, Ministériu Públiku akuza arguida Maria Anabela Sávio no DJ hanesan ko-autór materiál ho forma konsumada komete krime pekulatu ne’ebé previstu iha artigu 295 númeru 4 hosi Kódigu Penál.

Kazu ne’e rejista iha Tribunál Distritál Dili (TDD) ho númeru NUC 0006/19.CACTL, nune’e ajenda audiénsia julgamentu ba kazu refere sei realiza iha kinta (27 maiu 2021), tuku 10h00 dadeer.

Jornalista: Evaristo Soares Martins

Editór: Cancio Ximenes

iklan
iklan

Leave a Reply

iklan
error: Content is protected !!