TDD. Imajen Tatoli /Dok

DILI, 25 maiu 2021 (TATOLI)—Defeza ne’ebé fó asisténsia legál ba arguidu na’in-11, sei hatama rekursu hodi kontra dezisaun Tribunál Distritál Dili (TDD), ne’ebé aplika prizaun preventiva ba arguidu-sira iha primeiru interrogatóriu, relasiona ho kazu omisídiu, iha aredór Universidade da Paz (UNPAZ), 22 juñu 2020, no rezulta Henrique Soares Maia lakon-vida.

“Bainhira despaixu Tribunál sai ona, ami sei hatama rekursu iha tempu badak,” Defensór Públiku, Estaquio Guterres, hateten ba jornalista Agéncia Tatoli, via telefónika, tersa ne’e.

Notísia relevante:Kazu UNPAZ, TDD aplika prizaun preventiva ba arguidu 11

Razaun halo rekursu, tanba deklarasaun ne’ebé durante ne’e arguidu-sira fó ba Tribunál diferente ho Ministériu Públiku (MP) rona hosi testamuña-sira ne’ebé fó informasaun no arguidu-sira partisipa hotu iha primeiru interrogatóriu deklara la hatene kona-bá akontesimentu ne’e.

Iha semana kotuk, TDD liu hosi desizaun primeiru interrogatóriu, aplika ona prizaun preventiva ba arguidu na’in 11, ne’ebé deskonfia involve iha kazu omesídiu iha ne’e.

Tribunál mós aplika medida koasaun aprezentasaun periódika ba arguidu na’in-haat no na’in-tolu Termu Identidade Rezidénsia (TIR).

Ba arguidu ne’ebé ho aprezentasaun periódika  mensalmente sei aprezenta an iha estasaun polísia ne’ebé besik, no sira ne’ebé hetan TIR, bainhira sai hosi Dili ba munisípiu seluk, tenke hato’o ba parte polísia.

Ministériu Públiku (MP) akuza  arguido-sira ho krime omesídiu agravadu ne’ebé previstu iha artigu 139 iha kódigu penál Timor-Leste.

Tuir regra prosesuál, desizaun Tribunál sai ona ba prosesu ruma, bainhira parte sira la aseita bele halo rekursu dentru prazu loron 15.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here