Plenária Parlamentu Nasionál. Imajen Tatoli/António Gonçalves.

DILI, 27 maiu 2021 (TATOLI)—Parlamentu Nasionál (PN), kinta ne’e aprova votu pezár ba saudoza Lourdes Maria Assunção de Jesus Marcarenhas Alves de Araújo “Bi-Kiak’ no Saudozu Eduardo de Deus Barreto “Dusae”,  hodi presta omenajen ikus ba sira-nia kontribuisaun iha uma fukun no luta ba prosesu libertasaun nasionál.

Notísia Relevante:  Eroína Merita Alves “Bi-Ki’ak” luta makaas ba emansipasaun feto

Votu númeru 12 ba falesimentu antiga deputada Merita Alves no votu númeru 13 ba falesimentu Eduardo de Deus Barreto “Dusae”. Maske votasaun ketak-ketak maibé rezultadu votasaun a-favór 54 ba eis lejizladór na’in-rua.

Notisia Relevante:

“Nune’e rezultadu votasaun númeru 12 no 13 pasa,” Prezidente Parlamentu Nasionál, Deputadu Aniceto Longuinhos Guterres, anunsia liuhosi plenária Parlamentu Nasionál.

Votu pezár ho sentidu fó rekuñesimentu ba eis lejizlatór na’in-rua nia kontribuisaun ba Parlamentu Nasionál nu’udar deputada no deputadu.

Saudoza Merita Alves ‘Bi-Kiak, nu’udar ativista, líder no Membru Assembleia Constituinte no Deputada ba lejizlatura dahuluk hosi Partidu FRETILIN, hahú nia partisipasaun polítika ho tinan sanulu resin sia (19), iha Baze de Apoiu, iha tinan 1976.

Saudoza ho naran koñesida ho naran Merita Alves, ho naran kódigu Bi-Kiak, moris iha Hatulia, Ermera, 15 agostu 1956, oan dahuluk huoi Hermínio Marques Alves no inan Guilhermina de Jesus Alves.

Entretantu, saudozu Eduardo de Deus Barreto “Dusae”, moris iha tempu kolonizasaun portugueza nian, iha aldeia Aiceo, Suku Raimerhei, Munisípiu Ermera, iha dia 14 de Agostu 1951.

Hafoin aprova votu pezár, Parlamentu Nasionál hala’o sesaun solene hodi presta omenajen ba saudoza no saudoza maibé iha oras ne’ebé la hanesan.

Notísia Relevante: Aviaun Citilink transporta saudozu “Dusae” nia isin-mate mai Dili

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here