Mate-isin Saudozu Eduardo de Deus Barreto ‘Dusae’ ne'ebé tranporta ho aviaun Citilink bainhira to’o iha aeroportu Nicolao Lobato, Dili, kinta (27 maiu 2021). Imajen Tatoli/Antonio Gonçalves.

DILI, 27 maiu 2021 (TATOLI)—Eis Vise-Prezidente Parlamentu Nasionál, Eduardo de Deus Barreto “Dusae nia isin mate transporta ona ho aviaun Citilink mai Timor-Leste.

Notísia Relevante: Eis Vise-Prezidente Parlamentu Nasionál “Dusae” hakotu iis iha Jakarta

Aviaun Citilink tún iha aeroportu Nicolau Lobato, iha kinta, oras 14:50 ne’ebé akompaña ho saudozu nia oan mane. Oan mane hosi saudozu, Francisco Soares, agradese ba parte ne’ebé konstribui hosi transporta mate-isin mai Timor-Leste.

“Tuir informasaun ne’ebé ami hosi doutór sira katak ami-nia pai moras fuan, laiha tán informasaun seluk. Ami hato’o agradese ba parte ne’ebé konstribui hosi transporta mate-isin mai Timor-Leste,” Francisco Soares hateten a jornalista sira, iha aeroportu Nicolau Lobato, kinta ne’e.

Mate-isin Saudozu Eduardo de Deus Barreto ‘Dusae’ ne’ebé tranporta ho aviaun Citilink bainhira to ‘o iha aeroportu Nicolao Lobato, Dili, kinta (27 maiu 2021). Imajen Tatoli/Antonio Gonçalves.

Semana rua liubá, nia haktuir, saudozu sente pela primeira vez atake kardíaku/jantung iha nia uma iha Gleno, situasaun ne’ebé obriga família tenke lori nia halai ba ospitál. Haree ba kondisaun ida-ne’ebé alarmante, médiku deside lori mai Dili atubele hetan tratamentu intensivu.

Nune’e liutiha semana ida, médiku sira akonsella para lori ba kontinua tratamentu iha Jakarta hodi bele halo intervensaun ho di’ak liután.

Molok arranka ba Jakarta iha loron 23 maiu, saudozu rasik la hatudu sinál preokupante. Nia rasik konfiante loos katak buat hotu sei la’o ho di’ak, halo família no amigu tomak senti laran-metin.

Maibé derepente, iha loron 26 maiu ne’e, informasaun hosi Jakarta katak eis deputadu ne’e hakotu ona iis.

Tuir observasaun Agência TATOLI, mate-isin ho aviaun Citilik tún iha aeroportu Nicolau Lobato iha tuku 14:50 ne’ebé akompaña hosi família balun.

Hafoin tún hosi aviaun, karreta hosi Konsellu Veteranu mak tula ba iha sede CNRT ne’ebé akompaña hosi veteranu, família, kolega no estrutura partidu CNRT nian.

Sai hosi sede Partidu CNRT no kontinua kedas ba Parlamentu Nasionál hodi presta omenajen ikus.

Saudozu Eduardo de Deus Barreto “Dusae”, moris iha tempu kolonizasaun portugueza nian, iha aldeiu Aiceo, Suku Raimerhei, Munisípiu Ermera, iha loron 14 agostu 1951.

Saudozu husik hela nia aldeia no família hotu ho idade tinan sia (9) iha 1960, hahú estudu iha Colégio de “Infante Sagres” iha Maliana.

Hafoin ne’e, Saudozu kontinua kedas nia estudu primeiru síklu preparatóriu sekundáriu nian iha eskola “Professor Silva e Cunha” iha Dili hodi prepara ba Liceu. Iha 1969 Saudozu tama Liceu “Dr. Francisco Machado” no remata nia estudu ho Kintu Ano.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here