Polísia Nasionál Timor-Leste (PNTL) Unidade Patrulamentu Maritima (UPM), tula nesesidade bázika ba komunidade afetadu inundasaun iha Lagoa Tasi-tolu, sesta (09/04/21). Imajen Tatoli/António Gonçalves.

DILI, 11 abríl 2021 (TATOLI)—Governu liu hosi Ministeriu Negósiu Estranjeiru no Kooperasaun (MNEK), haruka ona pedidu ofisiál ba nasaun lubuk ida, atu husu apoiu umanitáriu internasionál, hodi responde ba dezastre naturál ne’ebé akontese iha 04 abríl.

“Ita haruka ona pedidu ofisiál ba nasaun lubuk-ida, maibé ha’u labele temi nasaun hira mak prontu ona, tanba sei iha konfirmasaun no Japaun mak responde direitamente,” Sekretáriu Jerál MNEK, Jorge Camões, hateten ba jornalista-sira iha Aeroportu Internasionál, Prezidente Nicolau Lobato, Comoro, domingu ne’e.

Notísia relevante:Governu mobiliza apoiu internasionál hatán impaktu hosi inundasaun

Sekretáriu Jerál MNEK ne’e hateten, oras ne’e daudaun Governu kontinua hein resposta hosi nasaun-sira, atu bele apoia Timor-Leste (TL) iha situasaun kalamidade.

“Iha ona konfirmasaun, iha tempu badak Austrália sei haruka ajudu umanitáriu no sasán saida de’it mak fó ita prontu simu,’’ Jorge Camões subliña.

Iha fatin hanesan, Sekretáriu Estadu Protesaun Sivíl (SEPS), Joaquim Gusmão, hateten bainhira akontese dezastre naturál, SEPS halo kedan koordenasaun ho parseiru nasionál no internasionál lubuk-ida, hanesan Organizasaun Nasaun Unida (ONU) iha TL ho sira-seluk, hodi serbisu hamutuk atu responde situasaun ne’e.

Iha 08 abríl, Konsellu Ministru (KM) deside aprova mobilizasaun internasionál, hodi hatán ba impaktu hosi dezastre naturál ne’ebé akontese iha 04 abríl.

Jornalista: Nelson de Sousa

Editór: Cipriano Colo

PUBLISIDADEiklan

HAKEREK NO HATÁN

Please enter your comment!
Please enter your name here