Saudozu Eduardo de Deus Barreto ‘Dusae’. Imajen/Espesiál.

DILI, 26 marsu 2021 (TATOLI)—Eis Vise-Prezidente Parlamentu Nasionál iha lejizlatura datoluk, Eduardo de Deus Barreto ‘Dusae’ hakotu iis iha ospitál Jakarta Indonézia. Eis Deputadu ne’e hakotu iis ohin dadeersan maizumenus tuku 09.00 oras Jakarta, Indonézia no tuku tuku 11.30 oras Timor-Leste nian. 

“Ohin, iha tuku 11:30 ami simu novidade tristeza ne’e direta mai hosi Jakarta liuhosi nia oan-mane ne’ebé ke akompaña nia kuandu evakua hosi Dili ba Jakarta. Ne’e novidade ida tristeza tebes ba bankada CNRT no partidu CNRT no mós ba veteranu sira tanba eis deputadu Dusae iha tempu rezisténsia nu’udar kuadru importante ida bainhira reorganiza funu iha 1980 mai leten iha konsentrasaun rejiaun IV iha Ermera,” Membru Parlamentu Nasionál, Deputadu Adérito Hugo da Costa, informa ba Agência TATOLI, iha Parlamentu Nasionál, kuarta ne’e.

Adérito Hugo fó-sai katak, eis deputadu no veteranuu ne’e enfrenta moras iha Ermera no família sira hamutuk ho Konsellu Veteranu evakua kedas mai Hospital Nacional Guido Valadres, maibé haree katak nia moras ne’e sériu entaun evakua ba fali Jakarta maibé la konsege salva nafatin.

Eis Prezidente Parlamentu Nasionál ne’e akresenta, oras ne’e Konsellu Veteranu mak halo hela koordenasaun atubele transporta mate-isin hosi Jakarta mai Dili.

“Oras ne’e daudaun hosi Konsellu Veteranu no parte hotu-hotu buka hela dalan oinsá transporta mai Dili. Ita hatene katak kuandu hosi Dili ba li’ur ne’e fásil maibé hosi li’ur mai Dili mak presiza tempu maibé parte hotu-hotu tenta hela dalan,” nia dehan.

Saudozu Eduardo de Deus Barreto ‘Dusae’ nu’udar mós fundadór Partidu CNRT hamutuk ho Kay Rala Xanana Gusmão iha 2007.

Nune’e iha eleisaun jerál 2007 to’o 2012 eleitu nu’udar membru parlamentu hosi bankada CNRT nian iha lejizlatura daruak. Hosi hosi 2012 to’o 2017 nu’udar membru parlamentu hosi bankada CNRT, maibé iha 2016 konfigurasaun polítika mosu iha Parlamentu Nasionál.

Iha lejizlatura datoluk (2016-2017), Adérito Hugo da Costa nu’udar Prezidente Parlamentu Nasionál no Eduardo de Deus Barreto ‘Dusae’ nu’udar Vise-Prezidente Parlamentu Nasionál.

“To’o nia hakotu iis mós nafatin nu’udar fundadór partidu CNRT nian no kontinua halo konsolidasaun partidu nian iha baze iha Ermera. Ne’e mós notísia tristeza ba rede veteranu nian tanba ema ida-ne’ebé dedika nia vida tomak iha tempu rezisténsia komesa hosi tinan 1975 to’o 1999 nu’udar kuadru iha reorganizasaun funu,” nia haktuir.

Nia subliña, prosesu bainbain Parlamentu Nasionál sempre presta omenajen liuhosi serimónia solene ba mate-isin maibé oras ne’e iha hela estadu emerjénsia no aplika hela medida serka sanitária no konfinamentu domisiliária entaun meza parlamentu mak sei haree buat sira-ne’e.

Nia dehan, oras ne’e mós hosi parte partidu CNRT mós koordena ho parte hotu-hotu inklui Konsellu Veteranu no família matebian atu transporta mate-isin mai Timor-Leste.

Entretantu, Deputadu Adérito Hugo mós labele fó-sai moras ne’ebé eis deputadu ne’e enfrenta.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here