Membru PNTL hosi Diresaun Nasionál Tránzitu no Seguransa Rodoviária (DNTSR), hala’o pasa revista no halo apreensaun ba motór ne’ebé laiha dokumentu, iha Palásiu Governu oin, kuarta (26/05/21). Imajen Tatoli/António Gonçalves.

DILI, 26 maiu 2021 (TATOLI)—Polísia Nasionál Timor-Leste (PNTL), Diresaun Nasionál Tránzitu no Seguransa Rodoviária (DNTSR), halo apreensaun ba motorizada 150-resin inklui karreta privadu balun, bainhira halo operasaun iha Dili laran, hahú tersa to’o kuarta ohin.

Komandante Polísia, Diresaun Nasionál Tránzitu no Seguransa Rodoviária (DNTSR), Superintendente Polísia, João Belo dos Reis, esplika apreensaun ne’e halo tanba sidadaun-sira viola regra Serka Sanitária (SS) no Konfinamentu Domisiliáriu (KD).

Notísia relevante:PNTL detein abitante na’in 37 viola regra Estadu emerjénsia

“Komandu halo pasa revista iha kapitál Dili, hahú horisehik to’o ohin, ita halo apreensaun ba motorizada ho karreta hamutuk 150-resin, inklui karreta sira,” Superintendente Polisia, João Belo, hateten ba jornalista Agência Tatoli, iha Palásiu Governu, kuarta ne’e.

Nia sita, rezolusaun Governu-nian kona-bá Konfinamentu Domisiliáriu no mós Serka Sanitária (SS), tama mós iha prosesu operasaun polísia tránzitu, hodi alerta informasaun ba abitante, atu kumpre regra ne’e.

Durante halo apreensaun, PNTL nota maioria abitante hala’o viazen, balun dokumentu motór laiha,  karta kondusaun laiha, no tuir lei polísia halo apreensaun, infratór-sira tenki selu multa iha banku.

“Apreensaun ne’e atu kontrola ita-nia infratór-sira ne’ebé motór dokumentu laiha. Bainhira dokumentu laiha di’ak liu lalika sai hosi uma tanba ita haree asidente ne’ebé mosu barak, kauza hosi ema sira ne’ebé karta kondusaun laiha,” nia hateten.

João Belo alerta ba abitante bainhira atu halo movimentu tenki lori dokumentu transporte kompletu nu’udár medida importante, hodi evita polísia labele halo apreensaun.

Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, hahú hosi 13 maiu 2021, tenke hela iha uma ka iha alojamentu temporáriu, eseptu iha razaun forte, liuliu relasiona ho seguransa públika, serbisu no ba asesu sasán no serbisu ba nesesidade bázika.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here