Membru PNTL hala’o patullamentu tama-sai bairru iha Dili, hodi asegura komunidade durante situasaun serka sanitária, kuarta (12/05/21). Imajen Tatoli/António Gonçalves.

DILI, 21 maiu 2021 (TATOLI)—Polísia Nasionál Timor-Leste (PNTL), liu hosi Komandu munisípiu Dili, detein no halo identifikasaun ba abitante na’in 37, iha Dili, ne’ebé viola regra Estadu ermerjénsia no serka sanitária ba dala 13, hahú hosi 1 to’o 20 maiu 2021.

Portavóz Komandu Jerál PNTL, Superintendente Xefe, Arnaldo de Araújo, esplika, abitante hirak-ne’e kompostu hosi mane na’in 33, no feto na’in-haat, maioria la kumpre regra hanesan halo jinástiku iha tasi-ibun no halibur-malu barak la kontrola distánsia sosiál, balun selebra festa restaurasaun independénsia ba dala 19 iha 20 maiu, hodi hemu tua iha fatin públiku.

Notísia relevante:PNTL detein abitante 79 ne’ebé dezvia hosi Dili atu ba munisípiu

“Sira viola regra serka sanitária no na’in 10 hemu tua iha bairru Palapasu, balun la koopera bainhira polísia halo hela sosializasaun ba regra,” Arnaldo de Araújo hateten ba jornalista-sira, liu hosi konferénsia imprensa, iha Komandu Jerál PNTL, Caicoli, sesta ne’e.

Iha parte seluk, PNTL mós lori ona kazu festa Colmera ba rejista ona iha Ministériu Públiku, hodi hein prosesu lori kazu ne’e ba Tribunál.

Bainhira jornalista husu kona-bá abitante 300-resin ne’ebé hasa’e bandeira RDTL, hodi selebra festa restaurasaun independénsia ba dala 19, iha área Masin Lidun, Tasi-tolu, Arnaldo de Araújo dehan, PNTL la hatene informasaun kona-bá asuntu ne’e.

Entretantu Rezolusaun Governu ba impozisaun konfinamentu domisiliáriu jerál ba ema hotu-hotu ne’ebé hela iha Munisípiu Dili, hahú hosi 13 maiu 2021, tenke hela iha uma ka iha alojamentu temporáriu, eseptu iha razaun forte, liuliu relasiona ho seguransa públika, serbisu no ba asesu sasán no serbisu ba nesesidade bázika.

Rezolusaun Governu kona-bá impozisaun konfinamentu domisiliáriu jerál, sita mós katak, autoridade polisiál fiskaliza kumprimentu ba regra ne’ebé hatuur ona iha Rezolusaun ne’e, aviza infratór-sira bainhira la kumpre Rezolusaun ne’e, konsidera prátika krime dezobediénsia.

Autoridade polisiál sei komunika ba Ministériu Públiku kona-bá identidade hosi ema ne’ebé, hafoin avizu ne’ebé prevee iha fraze anteriór no kontinua la respeita regra ne’ebé prevee ona iha Rezolusaun Governu.

Bainhira ema hosi estranjeiru la respeita  regra-sira ne’ebé prevee iha Rezolusaun Governu ne’e, autoridade polisiál sei komunika sira-nia identidade ba Serbisu Migrasaun.

Rezolusaun ne’e mós bandu movimentu transporte públiku iha área-sira hotu iha Munisípiu Dili, liuliu, mikrolete, taxi no anguna.

Bandu atividade relijioza ne’ebé implika ezisténsia ema halibur-malu. Ba efeitu Rezolusaun Governu ne’e, konsidera nu’udár ema halibur-malu  liu hosi na’in-rua, tenke iha distánsia fízika menus hosi metru rua.

Jornalista: Eugénio Pereira

Editór: Cipriano Colo

HAKEREK NO HATÁN

Please enter your comment!
Please enter your name here