Governu prepara ona foos iha Tasi-tolu, hodi distribui ba komunidade afetadu inundasaun iha Lagoa Tasitolu, (11/04/21). Imajen Tatoli/António Gonçalves.

DILI, 26 maiu 2021 (TATOLI)—Sekretária Estadu Protesaun Sivíl (SEPS), distribui apoiu umanitáriu ba família 401, iha suku Mascarenhas postu administrativu Vera Cruz ho suku Camea postu administrativu Cristo Rei, munisípiu Dili.

“Ita fó apoiu nesesidade bázika hanesan ai-hán no la’ós ai-hán ba família 60 hosi aldeia 01, suku Mascarenhas ne’ebé iha sentru akollamentu eskola 4 setembru ho família 336 iha suku Camea. Ajenda lorokraik kontinua fó ba família lima iha sentru akollamentu eskola 5 de maiu Comoro,” Diretór Nasionál Jestaun Risku Dezastre Naturál, SEPS, Agostinho Cosme Belo, hateten ba jornalista-sira iha eskola 4 setembru Balide, kuarta ne’e.

Notísia relevante:SEPS distribui apoiu emerjénsia ba família 744 iha Manleuana-Comoro

Sasán ne’ebé família afetadu-sira simu ho pakote, kompostu hosi ai-hán hanesan foos, mina bimoli, susu-been, ikan lata, super mie, biskuit, sasán kuziña ho sira-seluk.

Agostinho Cosme Belo apela ba família afetadu dezastre naturál ne’ebé seidauk hetan apoiu umanitáriu, bele hato’o reklamasaun ba líder komunitáriu, nune’e SEPS bele fó apoiu.

Tuir dadus hosi Governu, to’o 18 maiu 2021, Ministéiru Administrasaun Estatál (MAE) hamutuk ho liña ministéiru-sira, halo ona intervensaun hodi distribui apoiu umanitáriu hanesan ai-hán no la’ós ai-hán ba família afetadu dezastre naturál, hamutuk 33.375 iha territóriu nasionál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here