Foos ne’ebé Governu prepara ba família afetadu dezastre naturál iha Lagoa Tasi-tolu (11/04). Imajen TATOLI/António Gonçalves.

DILI, 24 maiu 2021 (TATOLI)—Sekretária Estadu Protesaun Sivíl (SEPS), kontinua oferese apoiu emerjénsia ba família hamutuk 744 hosi suku Manleuana ho suku Comoro, postu administrativu Dom Aleixo, munisípiu Dili, ne’ebé afetadu ba dezastre naturál iha 04 abríl.

“Ohin ita fó apoiu ba suku Manleuana iha família 446 mai hosi aldeia rua hanesan Lauloran ho Mane-Mesak no iha suku Comoro ho família 298  hosi aldeia Golgota,’’ Xefe Departamentu Jestaun Emerjénsia, Ermelinda Pires, hateten ba jornalista Agência Tatoli, iha sede suku Balibar, segunda ne’e.

Notísia relevante:SEPS oferese materiál konstrusaun ba família 57 iha Balibar

Sasán ne’ebé família afetadu-sira simu ho pakote, kompostu hosi ai-hán hanesan foos, mina bimoli, susu-been, ikan lata, super mie, biskuit, sasán koziña ho sira-seluk.

Nia husu família ne’ebé seida’uk simu apoiu atu halo reklamasaun ba autoridade lokál, nune’e bele hetan apoiu.

Tuir dadus, hosi Governu, to’o 18 maiu 2021, Ministériu Administrasaun Estatál (MAE) hamutuk ho liña ministériu-sira halo intervensaun distribui ona apoiu umanitáriu hanesan ai-han no la’ós ai-han ba família afetadu dezastre naturál, hamutuk 33.375 iha territóriu nasionál.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here