Tribunál Distritál Dili. Imajen/Dok.Tribunais.tl

DILI, 26 maiu 2021 (TATOLI)—Ministériu Públiku (MP), liu hosi prokuradór Jacinto Babo, iha alegasaun finál husu ba Tribunál Distritál Dili (TDD), atu aplika pena prizaun tinan 28 ba arguidu ho insiál LHL, relasiona ho kazu omesídiu agravadu ba Domingas Soares, inan hosi LM, ne’ebé akontese iha rezidénsia Raikotu, aldeia Tera Santa, suku Madohi, postu administrativu Dom Aleixo, munisípiu Dili, iha 2020.

Jacinto Babo, hateten MP laiha dúvida tanba produsaun prova ba faktu provadu hotu, tanba ne’e husu Tribunál atu aplika pena ho tinan 28 ba arguidu.

Notísia relevante:MP ho PCIC kontinua halo investigasaun ba kazu omisídiu Raikotu

“MP laiha dúvida, tanba haree faktu-sira ne’ebé iha ho prova hotu no arguidu-rasik konfesa imparsiál, hosi krime tolu ne’ebé MP akuza ba arguidu ida-idak mai ho nia pena. Husu atu Tribunál aplika pena prizaun tinan 28,” Jacinto Babo, hateten iha sala audiénsia TDD, kuarta ne’e.

Krime tolu ne’ebé mak MP akuza ba arguidu, hanesan krime omesídiu agravadu ne’ebé previstu iha artigu 139 iha kódigu penál Timor-Leste  ho nia moldura penál todan liu kadeia tinan 15, krime atentada omesídiu nia kastigu to’o tinan 12, no krime arma branka nia kastigu tinan rua.

Nune’e, MP foti pena únika hodi solisita ba Tribunál atu aplika pena prizaun tinan 28 ba arguidu LHL.

Defensór Públiku, Estaquio Guterres, ne’ebé fó asisténsia legál ba arguido, husu Tribunal atu fó justisa loloos tetu sirkunstánsia hotu atu aplika pena ne’ebé adekuadu ba arguidu, tanba iha prosesu julgamentu nia laran, arguidu hatudu nia arrependimentu, no koopera ho justisa.

Rona tiha alegasaun ne’e, Tribunál deside adia fila-fali julgamentu ne’e ba iha loron 09 fulan juñu 2021 iha tuku 9:00 otl hodi rona akordaun  ka dezisaun finál hosi Tribunál.

Kazu ne’e akontese iha loron 30 fulan outubru 2020, tuku 22:00 otl, vítima na’in-rua toba hela iha uma laran.

Arguidu LHL tenta atu tama ba vítima nia uma laran ho intesaun atu halo violasaun ba vítma ho inisiál ML, maibé la konsege tanba vitíma ML nia-inan haree hodi hakilar, no momentu ne’e arguidu oho kedan vítima ML nia-inan.

Audiénsia julgamentu ne’e prezide hosi juiz koletivu Maria Solana, Ana Paula no Juiz Ivan Antónino, Ministériu Públiku, reprezenta hosi prokuradór Jacinto Babo, no arguidu hetan asisténsia legál hosi defensór Públiku Estaquio Guterres.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here