DILI, 27 janeiru 2021 (TATOLI)–Banku Nasionál Komérsiu Timor-Leste (BNCTL, sigla portugés) promete sei atribui kartaun Automated Teller Machine (ATM) ba idozu, nune’e bele evita forma naruk iha resintu banku.
“Iha tempu badak ami sei introdús mekanizmu atendimentu foun ba kliente BNCTL hotu, liuliu ba idozu sira, bolsa da mãe, ezemplu sira ne’ebé hakarak uza kartaun débitu foti osan husi ATM no labele forma iha banku,” Diretó Ezekutivu BNCTL, Brígido de Sousa, informa liuhosi konferénsia imprensa iha salaun reuniaun Obrigadu Barak, Caicoli, kuarta ne’e.
Notísia relevante: BNCTL investiga kauza idozu Agostinho mate hafoin forma foti subsídiu
Iha tinan 2021 nia laran, banku nasionál sei aumenta tan mákina ATM 20, ne’ebé iha kada munisípiu sei tau mákina 2, inklui iha Dili.
“Nune’e idozu sira bele foti osan iha ATM, tanba ho mekanizmu sira ne’e mak bele fó atendimentu dignu ba idozu sira,” Brígido subliña.
Aleinde ne’e, banku nasionál mós koordena ona ho Banku Sentrál Timor-Leste (BCTL, sigla portugés) atu introdús sistema e-wallet, nune’ekliente sira hanesan idozu, bolsa da mãe, funsionáriu públiku ne’ebé osan tama iha BNCTL bele husu atu transfere ba e-wallet, no iha munisípiu bele foti osan husi sistema ne’e.
Introdusaun e-wallet, ba idozu sira kuandu sira ninia osan tama ona iha banku bele transfere kedas hodi sira bele ba foti iha kualkér fatin atu evita forma iha arredór banku.
Direjente ne’e mós dehan, BNCTL planea ona sosa ATM movél, nune’e se de’it mak atu foti osan la presiza ba forma ona.
Entretantu, kada fulan-neen BNCTL halo pagamentu ba idozu besik 100.000.
Jornalista: Antónia Gusmão
Editora: Julia Chatarina
