Estatua rua iha Baucau Vila Antiga. Imajen/foti hosi google

DILI, 26 maiu 2021 (TATOLI)-Forum Organizasaun Naun Governamentál Timor-Leste (FONGTIL) liuhosi nia pontu vokál iha Munisípiu Baucau, Agusto Pires, relata katak folin foos kilograma 25 kada saku  iha loja no kioske-sira iha merkadu Baucau hahú sa’e hosi $11.50 centavos ba $15.50 centavos.

Agusto Pires hateten, aleinde foos, supermi, mina no sasán nesesidade báziku sira seluk  tan  mós nia folin hahú sa’e  tanba impaktu hosi serka sanitaria ne’ebé aplika iha Baucau ho Dili hodi taka movimentu komersiál entre Dili ho Baucau.

Notísia Relevante : Modo-tahan iha Merkadu Manleuna ladún folin

“Tuir ami-nia observasaun iha área ekonomia, povu hasoru difikuldade ne’ebé boot liu, mak iha loja-sira, nesesidade bázika folin hahú sa’e, tanba falta kontrolu hosi Governu. Iha parte seluk produtu lokál ne’ebé ita-nia komunidade fa’an la folin tanba menus sirkulasaun osan iha komunidade nia leet,”  Agusto Pires hateten liuhosi komunikadu imprensa ne’ebé Agência Tatoli asesu, kuarta ne’e.

FONGTIL nia pontu vokál iha Munisípiu Baucau informa mós katak negosiante ho povu agrikultór-sira nia produtu lokál ne’ebé lori ba fa’an iha merkadu mós la folin, tanba menus kompradór.

Nia dehan, aleinde sasán nesesidade báziku folin sa’e no komunidade nia produtu la folin, iha parte saúde mós frekuénsia komunidade ba halo tratamentu iha Ospitál no Sentru Saúde sira hahú menus, tanba ema barak ta’uk teste swap no lakohi kontribui ba vasina AstraZeneca.

“Ita haree iha komunidade nia leet susar atu aplika protokolu saúde nian hanesan iha Merkadu, mate-uma no fatin selu-seluk, ema la uza distansiamentu sosiál, la uza máskara no la fase-liman, to’o ohin loron iha Munisípiu Baucau, ema barak mak seidauk hetan informasaun detallu kona-ba COVID-19 ho nia defeitu sira. Nune’e mós pesoál saúde-sira ne’ebé iha liña frente hodi halo atendimentu ba pasiente COVID-19 lamenta liu kona-ba atendimentu iha Sentru Integradu Jestaun Krize (CIGC-sigla Portugés), tanba sira la hetan fasilidade bainhira hala’o sira-nia knaar,” nia hateten.

Hosi parte edukasaun, nia dehan,iha fatin balun alunu nia aman-inan sira lamenta no protesta maka’as ba atividade eskola tanba besik fulan haat ona sira-nia oan la eskola no agora Profesór-sira prepara ona matéria segundu periodu nian, maibé estuda la aprende buat ida.

Sistema ne’ebé Governu kria atu kombate COVID-19 la adekuadu no eskola Online estudante barak mak la tuir tanba telefone laiha, nune’e labarik barak mak la aprende buat ida.

Kona-ba agrikultura, tuir observasaun pontu vokál FONGTIL hateten katak agora hahú hatudu ona sinál katak tempu tuir mai komunidade sei hamlaha tanba irrigasaun la funsiona, to’os barak mak abandona tanba ema barak mak ba buka nia moris iha sidade Dili, ema balun moris tuir projetu, maibé agora projetu mós laiha.

“Ami mós observa katak atividade dezenvolvimentu infraestrutura báziku la la’o no mega projetu  hanesan estrada Baucau, Lautem,  Baucau  no Viqueque paradu,” Agusto Pires.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here