Atividade iha Merkadu Manleuana. Imajen/UNICEF Timor-Leste

DILI, 18 maiu 2021 (TATOLI)-Dezde Governu aplika Estadu Emerjénsia, serka sanitária no konfinamentu domisiliáriu obrigatóriu iha kapitál Dili, halo negosiante-sira iha Merkadu Manleuana, susar tebetebes tanba sira-nia modo-tahan ho ai-fuan ne’ebé sira fa’an ladún folin ona.

Negosiante Domingas Soares hateten, dezde Governu aplika serka sanitária aumenta konfinamentu obrigatóriu, modo-tahan ho ai-fuan-sira ne’ebé fa’an lafolin tanba kompradór-sira ladún halo movimentu ba sosa modo iha merkadu.

“Molok serka sanitária no konfinamentu obrigatóriu iha kapitál Dili, ami-nia modo-tahan folin di’ak, maibé agora susar liu to’o modo-tahan balun dodok soe tiha de’it,” Domingas Soares, hateten ba Agência Tatoli iha Merkadu Manleuana, tersa ne’e.

 “Ami hola modo sira fa’an karreta ne’e futun lima $2.00, ami fa’an fali futun ida $0.50, entaun ami manan mak $0.50 ne’e, maibé agora maluk sira ho karreta mai fa’an hotu ba kompradór-sira folin hanesan, ami fa’an ema la sosa, entaun osan inan no oan mós lakon hotu,” Domingas Soares hateten.

Gaspar Pereira, nu’udar mós negosiante iha Merkadu Manleuana hateten, durante karreta la halai ema tama Merkadu menus, produtu lokál ne’ebé nia fa’an dala-ruma soe de’it, tanba ema la sosa na’in sira han mós la hotu.

“Ha’u fa’an mak hanesan, lakeru, talas no fehuk, maibé agora ema laiha ne’ebé loron ida sorte di’ak bele hetan $5.00, maibé ema la sosa liu loron tomak mai tuur loro-kraik fila-fail de’it ba uma,”  Gaspar Pereira  haktuir.

Nia haktuir, produtu lokál sira ne’ebé nia fa’an hanesan lakeru ba sosa iha Liquiça butuk ida hamutuk $20.00 no fa’an fali lakeru boot ida $1.00 no ki’ik $0.50.

Jornalista       : Arminda Fonseca

Editór             : Francisco Simões

 

HAKEREK NO HATÁN

Please enter your comment!
Please enter your name here