Prezidente Institutu Nasionál Seguransa Sosiál (INSS), Longuinhos Armando. Imajen Tatoli/Osória Marques.

DILI, 25 maiu 2021 (TATOLI)—Prezidente Konsellu Administrasaun Institutu Nasionál Seguransa Sosiál (INSS), Longuinhos Armando Leite, hatete INSS halo mudansa rejistu ba atendementu fakultativu no empreza sira tanba simu xamada atensaun hosi Sentru Integrasi Jestaun Krize (SIJK).

Notísia Relevante: Apoiu empregu, INSS halo rejistu ba empregadór-traballdór iha dadeer-lorokraik

“Ita muda uitoan ita-nia mekanizmu atendementu ba ita-nia fakultativa traballadór, negosiante no empreza sira ne’ebé rejistu iha INSS ne’e tanba ita hetan xamada atensaun hosi SIJK, ne’ebé haree katak ladún respeitu medida prevensaun COVID-19 no regra distánsia sosiál. Tanba ne’e, ami tenke halo mudansa ba atendimentu no rejistu ne’e,” Longinhos Armando Leite hateten ba jornalista sira, iha nia knaar fatin MSSI Caicoli, Dili tersa ne’e.

Prezidente INSS dehan, mudansa ne’ebé INSS halo mak simu sira-nia dokumentu no sira fila kedas no sei sei la hein kleur hanesan atendementu fou-foun bainhira hahú loke  rejistu ne’e.

“Importante mak sira tenke tau sira-nia númeru kontaktu kompletu para lorokraik ami halo kontaktu ba sira. Ida-ne’ebé ami halo kontaktu no manda mensajén mak sira bele mai INSS, maibé sira-ne’ebé mak ami seidauk kontaktu no mensajén ba sira mak sira hein de’it. Ho mekanizmu ida-ne’e mak ita uza hodi atende agora,” nia dehan.

Tanba ne’e, nia husu ba negosiante, traballadór, empreza sira iha territóriu Timor-Leste katak hakbesik ba Sentru Solidaridade Sosiál (SSI) atu rejistu no hatama dokumentu to’o 27 maiu maibé ne’e ba fakultativa foun sira.

Ba fakultativu tuan sira, nia dehan, sei taka iha fulan juñu nia rohan maibé tenke kumpre nafatin regra ne’ebé Governu aplika ona antes hanesan uza máskara, halo distánsiamentu sosiál no fíziku.

Empreza no traballadór sira-ne’ebé tinan kotuk rejistu no hetan ona subsídiu, nia dehan, sira nafatin konsidera hodi rejistu agora tanba programa ida uluk ne’e bolu “apoiu ba ita-nia traballadór sira” no agora bolu “subsídiu ekstraordináriu ba ita-nia empreza no traballadór sira”.

“Nune’e, ami kontinua simu sira rejistu no ba sira ne’ebé uluk rejistu seidauk hetan mós kontinua mai nafatin. Sira uluk la hetan tanba ita aplika kritériu ne’ebé rigorozu uitoan. Ezemplu, motorista sira tenke hatama karta karreta nian, SIM. maibé kritériu ne’e mak mate ita la simu. Maibé agora lae, motorista sira lori kartaun eleitorál, SIM mós lori maibé bainhira SIM mate ona mós ita sei nafatin simu no presiza konta bankária,” nia dehan.

Jornalista: Osória Marques

Editór: Cancio Ximenes

HAKEREK NO HATÁN

Please enter your comment!
Please enter your name here