Formasaun ba Setór Emprezariál hosi Estadu via online. Imajen/ PFMO.

DILI, 25 maiu 2021 (TATOLI)—Public Financial Management and Oversight (PFMO) ‘osan povu nian, jere ho di’ak’, realiza formasaun online sinkrona  ‘Setór Emprezariál hosi Estadu’ ba auditór Kámara Konta hosi Tribunál Rekursu (TR), hahú hosi 24 to’o 28 maiu tinan ne’e.

Projetu PFMO komponente 2 iha kofinansiamentu hosi Uniaun Europeia (UE) no kofinansiamentu no jestaun hosi Camões I.P. seitór prinsipál ba projetu ne’e, hatama ba boa governasaun no objetivu hosi intervensaun ida-ne’e atu kontribui ba dezenvolvimentu sustentável Timor-Leste nian, liu-hosi jestaun no supervizaun ba finansa públika, ne’ebé transparente no orientadu.

Notísia relevante:PFMO fó formasaun jestaun finaseiru no indikadór ekonómiku ba IGE

Komunikadu ne’ebé Agéncia Tatoli asesu iha tersa ne’e, haktuir, formasaun ida-ne’e destinadu ba auditor-sira hosi Kámara Konta hosi Tribunál Rekursu, ho objetivu atu aprofunda koñesimentu ba vertente-sira hanesan, fó koñese konseitu hosi setór emprezariál hosi Estadu, insentiva diskusaun ba dezenvolvimentu modelu jurídiku, atu regula setór iha vertente asionista no hosi kontrolu inklui supervizaun.

Alende ne’e, analiza preokupasaun-sira hosi kontrolu ba entidade integrante-sira hosi setór públiku emprezariál no autonomia ba jestaun hosi jestór-sira, analiza preokupasaun Estadu, iha ámbitu atribuisaun kontrolu no supervizaun hosi finansa públika,  identifikasaun ba situasaun setór emprezariál hosi Estadu Timor-Leste.

Formasaun ne’e sei hala’o liu-hosi plataforma zoom no disponibiliza grupu formandu na’in 15, ho totál oras 10.

Iha periúdu 31 maiu to’o 7 juñu, sei hala’o formasaun hanesan, iha segunda edisaun ba auditor-sira seluk hosi Kámara  Konta, ho totál formandu 15.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here