Tékniku EDTL halo instalasaun ba liña distribuisaun eletrisidade iha Dili, kinta (04/03). Imajen TATOLI/António Gonçalves

DILI, 26 maiu 2021 (TATOLI)-Ministru Obra Públiku (MOP), Salvador Eugênio Soares dos Reis Pires, espera bele konklui konkursu públiku iha fulan-jullu, nune’e kompañia kualifikadu ba projetu instalasaun eletrisidade mobiliza materiál atu ezekuta obra iha tinan ne’e nia laran.

Eletricidade de Timor-Leste, Empreza Públika (EDTL, E.P) iha tersa (25/05) lansa ona konkursu públiku ba projetu instalasaun eletrisidade hamutuk pakote 30 iha suku 33, hosi totál suku 76 iha territóriu nasionál ne’ebé seidauk asesu.

“EDTL lansa ona konkursu ba programa planeadu eletrifikasaun ba projetu 34, maibé pakote haat EDTL mak implementa rasik, ne’ebé projetu 30 mak lansa iha konkursu públiku. Ita espera katak fulan-jullu bele konklui hodi empreza manan-na’in halo mobilizasaun hodi komesa implementa ona obra hirak ne’e,” Ministru Salvador informa iha Palásiu Governu, tersa ne’e.

Notísia relevante: Hahú ohin, EDTL,E.P lansa konkursu instala eletrisidade pakote 30

Kona-ba suku ne’ebé seidauk asesu eletrisidade, ekipa EDTL, E.P kontinua prepara dezeñu ba suku 42 hodi preprara fó sai konkursu iha fulan augostu ou setembru tinan ne’e.

“Ita hamutuk ho EDTL, E.P halo esforsu  hela atu promove projetu eletrifikasaun ba suku 76 iha tinan ne’e,” nia afirma.

Hahú loron  01 Juñu 2021, iha oras serbisu, kompañia ne’ebé iha interese bele foti dokumentu konkursu (kópia PDF iha CD) iha edifísiu Caicoli, ne’ebé sei sosa hosi kandidatura sira ne’ebé iha interese bainhira hato’o aplikasaun no selu $100 cash ka depózitu iha banku.

Tuir ajenda, empereza estatál ne’e sei hala’o konferénsa prévia iha loron 10 juñu 2021, tuku 15:00 iha salaun EDTL, E.P, Caicoli.

Orsamentu ba projetu eletrifikasaun iha suku 76 ne’ebé seidauk asesu eletrisidade hamutuk millaun $12, ne’ebé prevee ona iha orsamentu tinan ne’e.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here