Ministru Obra Públika, Salvador Eugênio Soares dos Reis Pires. Imajen TATOLI/Egas Cristóvão

DILI, 25 maiu 2021 (TATOLI)-Ministru Obra Públika, Salvador Eugênio Soares dos Reis Pires, akompaña ho Prezidente Konsellu Administrasaun Bee Timor-Leste, Empreza Públiku (BTL, E.P) hasoru malu ho Primeiru Ministru, Taur Matan Ruak, hodi aprezenta planu mestre projetu infraestrutura.

“Ami mai aprezenta hela planu mestre drenajen no saneamentu munisípiu Dili, ne’ebé mak konklui ona iha tinan 2019 no planu implementasaun ita hahú fó sai ona konkursu ho orsamentu ne’ebé prevee iha ona iha tinan ne’e,” Ministru Salvador informa hafoin reuniaun ho Xefe Governu, iha Palásiu Governu, tersa ne’e.

Tuir governante ne’e, konkursu ba projetu drenajen no sanemantu hanesan kanál inkonsta ne’ebé dezvia bee tun hosi foho iha Manleuana bá mota Comoro no konstrui barreira atu satan bee hosi área Vila-verde ba mota Maloa inklui dezvia mós bee iha Mascarinhas ba mota My Friend, Balide.

“Ita halo ona faze konkursu no ita hein katak Bee Timor-Leste bele konklui prosesu aprovizionamentu hodi deside empreza manan-na’in hodi bele hahú konstrusaun iha tinan ne’e,” nia akresenta.

Notísia relevante: Governu hahú sosializa projetu drenajen Dili ba komunidade afetadu

Projetu kanál drenajen finansia mós hosi Millennium Challenge Corporation (MCC), ne’ebé forma ona ekipa traballu atu tau-matan ba implementasaun projetu.

“Ami-nia parte liuhosi BTL,E.P komunika nafatin ho Compact Development Team Timor-Leste (CDT-TL), ne’ebé iha ona faze téknika ajustamentu dezeñu iha área intervesaun sira,” nia hatutan.

Área projetu drenajen iha munisípiu Dili fahe ba rejiaun tolu hanesan sentru, oeste no leste, ne’ebé MCC sei kobre ka investe iha parte sentru no ba sanemantu, enkuantu MOP sei kobre hosi Tibar to’o Ponte Bidau hodi halo tratamentu ba bee foer sintina nian.

Tinan 2019, ekipa liña ministeriál ho CDT-TL finaliza ona levantamentu dadus ba abitante afetadu sira hodi fo indemnizasaun, nune’e bainhira tama iha faze implementasaun projetu labele fó impkatu sosiál ba komunidade sira ho baze ba despaisu hosi Xefe Governu numeru 034/L/7/2019.

Aleinde ne’e, Ministru hato’o ba Xefe Ezekutivu atu haree re-kondisaun balun, liuliu parte komponente importante balun ne’ebé seidauk hetan finansiamentu liga ho investimentu infraestutura atubele prevene inundasaun.

“Ita husu ba Primeiru-Ministru atu suporta polítika no finaseiru atu ita bele implementa, nune’e bele komplementa esforsu atu prevene inundasaun iha futuru hanesan mota My friend no mota Maloa tanba dezeñu preparadu hotu ona,” nia subliña.

Komisaun interministeriál nia serbisu konklui ona, ne’ebé foku ba planu mestre no problema liga ho projetu drenajen no saneanetu iha Dili, atu rezolve impatu ambientál no mudansa klimátika, liuliu inundasaun ne’ebé kada tinan mosu iha kapitál Dili.

Notísia relevante: MOP-SEA Estabelese Komisaun Impaktu Ambientál ba Projetu Saneamentu no Drenajen Dili

Entretantu, Governu liuhosi grupu tékniku hosi komisaun interminsiteriál finaliza ona sosializasaun implementasaun planu mestre ba mapa liña projetu ezekusaun drenajen no saneamentu iha kapitál Dili ba autoridade lokál no komunidade afetadu sira.

Kustu estimasaun planu mestre ba implementasaun projetu drenajen no sanemeantu ne’e hamutuk millaun $300-resin, ne’ebé parte MCC sei kontribui fundu millaun $200-resin.

Jornalista Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here