Komisaun liña interministeriál sosializa projetu drenajen Dili ba komunidade afetadu, iha sede Suku Akadiru-hun, segunda (10/08). Imajen Tatoli/Florêncio Miranda Ximenes

DILI, 10 agostu 2020 (TATOLI)-Governu liuhosi grupu tékniku hosi komisaun interministeriál, hahú sosializa implementasaun planu mestre ba mapa liña projetu ezekusaun drenajen no saneamentu iha kapitál ba autoridade lokál no komunidade ne’ebé afeadu iha Postu Administrativu Nain Feto.

Komisaun liña interministeriál ne’e, kompostu husi Ministériu Finansa (MF), Ministériu Justisa (MF), Ministériu Agrikultura no Peska (MAP), Sekeretaria Estadu Protesaun Sivíl (SEPS), ne’ebé prezide husi Ministériu Obra Públika (MOP), bazeia ba despaisu Primeiru-Ministru, Taur Matan Ruak, ho númeru 034/L/7/2019.

Diretór Nasionál Servisu Água no Saneamentu, Gustavo da Cruz, dehan enkontru tékniku ohin diskute kona-ba problema fundamentál atu implementa planu mestre ba komunidade afetada sira.

“Ita halo sosializasaun ba implementasaun planu mestre drenajen no saneamentu iha kapitál Dili ba komundiade afetadu iha área Postu Administrativu Nain Feto no sei kontinua ba Postu Administrativu Vera Cruz, Cristo Rei no Don Aleixo, hodi fó kontribuisaun ba implementasaun projetu ne’e,” tenik Diretór Gustavo da Cruz, iha sede Suku Akadiru-hun, segunda ne’e.

Estudu planu mestre ba drenajen no saneamentu iha kapitál Dili husi konsultór Austrália hahú iha tinan 2011 no 2012 no iha 2013 to’o 2017 hala’o ona melloramentu planu ba kanál drenajen sira iha kapitál Dili.

Tinan-ne’e, iha faze finál atu halo estudu impaktu ambientál no planu saneamentu iha kapitál Dili atu hahú konstrusaun iha tinan 2021.

Projetu ba sistema drenajen no saneamentu ne’e importante atu hamenus inundasaun no kria ambiente ne’ebé saudável ba abitante tomak iha sidade Dili.

Kustu implementasaun projetu millaun $300, uma-kain 600-resin afetadu

Projetu kanál drenajen finansia husi doadór Millennium Challenge Corporation (MCC) atu apoiu iha bee no saneamentu iha Dili, ne’ebé Governu haree prioridade atu implementa iha 2021.

Kustu estimasaun planu mestre ba implementasaun projetu drenajen no saneamentu iha Dili ne’e hamutuk millaun $300-resin, ne’ebé MCC apoia fundu millaun $200-resin.

“Ita-nia komundade jerál ne’ebé afetadu ne’e kuaze uma-kain 600-resin, ne’ebé liña ministeriál halo ona identifikasaun atu halo reapropriasaun,” nia akresenta.

Diretór ne’e dehan, liuhosi planu mestre, Governu halo planu sektorál sira atu rezolve infraestrutura bázika drenajen sira atu akumula udan-been, problema ambientál no mudansa klimátika hodi hapara inundasaun.

“Bainhira ita laiha planu sektorál sira sei fó impaktu fíziku ba ita-nia sidade no kria moras oin-oin, ne’ebé fó impaktu saúde ba komunidade iha kapitál Dili,” nia hatutan.

Sorin seluk, Prezidente Autoridade Munsípiu Dili, Gaspar Soares, husu ba autoridade lokál no komunidade atu apoia ba projetu drenajen no saneamentu iha kapitál Dili hodi hamenus impaktu ba dezastre naturál no inundasaun.

Diretór Jerál Sekretáriu Estadu Protesaun Sivíl, Superintendente Asistente Polísia Nasionál Timor-Leste (PNTL), Ismael da Costa Babo, apela ba komunidade afetadu sira atu fó kontribuisaun ba implementasaun projetu drenajen no saneamentu iha kapitál Dili.

“Ha’u husu ba komunidade sira atu fó apoia ba projetu ne’e tanba importante tebes atu hamenus dezastre naturál iha kapitál Dili ne’ebé kada tinan sa’e maka’as bainhira tempu udan,” nia sujere.

Komunidade apoia implementasaun projetu

Nune’e mós, Xefe Suku Akadiru-hun, Juvinal da Conceição, lori komunidade nia-naran apoia implementasaun projetu drenajen no Saneamentu.

“Ha’u husu ekipa liña ministeriál atu halo identifikasaun tuir mapa ne’ebé iha atu komunidade afetadu sira ba projetu ne’e bele simu indemnizasaun hafoin implementa projetu ne’e,” autoridade lokál ne’e rekomenda.

Komisaun interministeriál ne’e nia serbisu atu haree planu mestre no problema resentimentu projetu drenajen no saneamentu iha Dili atu rezolve impaktu ambientál no mudansa klimátika, liuliu inundasaun ne’ebé kada tinan mosu iha kapitál Dili.

Tuir kreximentu demográfiku iha Dili laran a’as hahú husi 2005 to’o 2010, kuaze porsentu 1,5 no 2010 to’o 2015 ho porsentu 15.

Daudaun ne’e tun ba porsentu 9-resin tanba ho konstrusaun barak entaun área ba bee atu halai menus ba beibeik.

Projetu ne’e rasik iha faze finál ba planu mestre no dezeñu detalladu ne’ebé mak hala’o husi Água de Portugál (AdP) no Governu mós halo ona kustu estimativu no hahú tama ona faze preparasaun ba prosesu resentimentu.

Projetu ne’e hanesan planu asaun ida atu atinje meta Planu Estratéjiku Dezenvolvimentu Nasionál (PEDN) 2011 to’o 2030 ne’ebé Timor-Leste nia populasaun sai prósperu, saudável, seguru no forte.

Jornalista: Florêncio Miranda Ximenes

Editora: Julia Chatarina

HAKEREK NO HATÁN

Please enter your comment!
Please enter your name here