Saudoza Merita Alves. Imajen/Espesiál.

DILI,25 maiu 2021 (TATOLI)—Sekretáriu Jerál Partidu Frente Revolucionária de Timor-Leste Independente (FRETILIN), Mari Alkatiri hato’o sentida kondolénsia aprofunda ba saudoza Merita Alves no konsidera nu’udar kombatente vensedora iha prosesu luta ba libertasaun nasionál.

Alkatiri hateten, FRETILIN lakon kuadru ne’ebé nakonu ho valór, prinsípiu no ema-ne’ebé íntegra no sempre prontu serbí FRETILIN no luta ba povu Maubere.

“Ita lakon eroína ida, espoza no inan ezemplár ida, líder kurijioza no barani, ne’ebé nakonu ho modéstia no umildade. Saudoza Merita Alves husik ona ita, maibé nia husik hela esperiénsia nu’udar kombatente vensedora ba ami iha prosesu luta ne’ebé defísil,” Sekretáriu Jerál FRETILIN hato’o sentida kondolénsia ne’e liuhosi ninia rede sosiál, tersa ne’e.

Eis Prezidente RAEOA ne’e hateten, Merita Alves nia isin bele lakon maibé alma ne’e nu’udar soin ba memória ba família no ema hotu, tanba sei rai iha fuan hosi povu hotu, hosi jerasaun ba jerasaun.

“Merita Alves! Ita boot husik ona ami iha loos loron Nicolau Lobato selebra tinan moris nian. Karik ne’e asidentál. Deskansa ho Hakmatek Kamarada Merita.  Karik ita boot sempre prezente iha ami-nia luta,” Sekjer FRETILIN nia mensajen ikus ba família matebian.

Iha parte seluk, Asosiasaun Cheba Ba Ita Hotu (ACbit), hato’o mós sentida kondolénsia ba saudoza Merita Alves, ne’ebé husik ona mundu.

“Hanesan feto maluk ne’ebé luta makaas ba feto nia direitu no ba ukun rasik-aan, saudoza Merita Alves liuhosi esperiénsia moruk, hetan dadur iha fatin detensaun sira iha rede durante okupasaun Indonézia,” ACbit espresa iha sira-nia pajina rede sosiál.

Organizasaun Assosiasaun Chega ba Ita (Acbit) hato’o agradesimentu ba saudoza Merita Alves nia kontribuisaun luta ba liberta Timor-Leste no iha ámbitu Timor-Leste nia ukun rasik aan kontribui no partisipa iha kampaña “La’o Konta Istória kona-ba Esperiénsia Feto iha Tempu Konflitu” ne’ebé organiza hosi Acbit no Un Woman-TL iha tinan 2018, no mós envolve ativu iha kampaña violénsia ba feto. Deskansa ho hakmatek, saudoza merita Alves.

Notísia Relevante: Bankada FRETILIN husu PN presta omenajen ba saudoza Merita Alves

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here