Saudoza Merita Alves. Imajen/Espesiál.

DILI, 25 maiu 2021 (TATOLI)—Bankada Frente Revolucionária de Timor-Leste Independente (FRETILIN), husu Parlamentu Nasionál (PN) presta omenajen ikus ba saudoza Merita Alves tanba saudoza nu’udar deputada iha Asembleia Konstituente no feto ne’ebé barani iha prosesu funu luta ba ukun rasik-aan.

Eis Deputada Merita Alves, hakotu peregrinasaun iha mundu, iha loron segunda, maizumenus tuku 17.00 lorokraik no mate-isin oras ne’e rai hela iha nia rezidénsia Kuluhun de Baixo, Dili.

“Ami sei fó hanoin ba meza prezidénsia atu hasai desizaun ruma, ne’ebé Parlamentu Nasionál tenke iha ajenda atubele presta omenajen ikus  ba saudoza. Merita Alves ne’e iha liña ida, tanba iha ai-laran ne’ebé serbisu besik ho gabinete Prezidente Nicolau Lobato nian, tanba nia mós elementu ida-ne’ebé serbisu besik liu Prezidente Nicolau Lobato iha ai-laran,” Xefe Bankada FRETILIN, Deputadu Francisco Miranda Branco, informa ba jornalista sira, iha resintu Parlamentu Nasionál, tersa ne’e.

Xefe Bankada FRETILIN ne’e haktuir, Merita Alves mós nu’udar priozioneira ida iha prizaun Tjing Fa Ho (besik banku ANZ), tanba inimigu deteta saudoza serbisu hamutuk ho Gabinete Prezidente Nicolau Lobato nian iha prosesu luta ba ukun rasik-aan.

“Nia vida ne’e nakonu ho persegisaun. Informasaun sira-ne’ebé kona-ba ai-laran nian, nia sempre envolve iha laran. Nia la’ós membru Asembleia Konstituente ne’ebé halo konstituisaun, maibé ema ida-ne’ebé hanesan feto ida espesiál, feto ida-ne’ebé nakonu ho korajen tanba nia mós subar rezisténsia barak, ida mak Somotxo, tanba deputadu Somotxo ne’e hela iha nia uma kleur durante períodu rezisténsia,” nia dehan.

Tuir informasaun ne’ebé Deputadu Francisco Miranda Branco asesu hosi família katak, eis deputada ne’e enfrenta moras kankru.

Tanba me’e, Xefe Bankada FRETILIN ne’e apela ba feto Timor-oan sira hotu iha Timor-Leste katak lalika moe hateten sai moras maibé tenke halo prevensaun.

Saudoza Merita Alves. Imajen/Espesiál.

“Moras ne’e silensiozu (nonok de’it), tanba tama ona iha kondisaun perigu mak foin mosu síntoma, entaun feto maluk sira iha Tomor-Leste, tenke halo prevensaun ba moras ida-ne’e. Maibé ha’u hakarak friza katak, nia feto ida-ne’e barani duni, tanba nia barani iha frente armada, ne’ebé serbisu hamutuk iha gabinete Prezidente Nicolau Lobato nian,” nia dehan.

Bainhira iha desmantelamentu, nia haktuir, ema kaer nia tanba saudoza ne’e serbisu hamutuk Prezidente Nicolau Lobato, entaun  nia tama prizaun Tjing Fa Ho.

“Iha altura ne’ebá prizioneiru sira tomak iha Tjing Fa Ho ne’e simu konsekénsia todan tebes, nia hamutuk ho Maria Gorrete,” nia haktuir.

Tuir informasaun ne’ebé Agência TATOLI, asesu hosi meza prezidénsia Parlamentu Nasionál, katak mate-isin sei la lori ba plenária maibé sei aprova votu pezár iha segunda-feira hodi presta omenajen ikus ba saudoza nia kontribuisaun iha tempu Asembleia Konstituente no iha prosesu funu. Meza prezidénsia mós sei koordena família matebian kona-ba saudoza ni biografia hafoin fó-sai ba públiku.

Nune’e mós saudoza sei haloot iha jardim dos herois Metinaro, maibé sei hein dekretu Prezidente Repúblika públika iha Jornál Repúblika.

Purtantu, deputadu sira hosi Parlmentu Nasionál hato’o ona sentida kondolénsia ba mate-isin iha nia rezidénsia Kuluhun de Baixo, Dili.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here