Logotipu TDD. Imajen Tatoli/Egas Cristóvão.

DILI, 18 maiu 2021 (TATOLI)—Tribunál Distritál Dili (TDD), liu hosi desizaun primeiru interrogatóriu, aplika ona prizaun preventiva ba arguidu na’in 11, ne’ebé deskonfia involve iha kazu omesídiu, iha Universidade da Paz (UNPAZ), iha 22 juñu 2020, ne’ebé rezulta Henrique Soares Maia lakon-vida.

Tribunál mós aplika medida koasaun aprezentasaun periódika ba arguidu na’in-haat no na’in-tolu Termu Identidade Rezidénsia (TIR).

Notísia relevante:Kazu UNPAZ, arguidu-sira submete ba primeiru interrogatóriu

Ba arguidu ne’ebé ho aprezentasaun periódika, mensalmente sei aprezenta an iha estasaun polísia ne’ebé besik, no hirak-ne’ebé hetan TIR, bainhira sai-hosi Dili ba munisípiu seluk, tenke hato’o ba parte polísia.

Arguidu-sira hamutuk na’in 18 kompostu hosi feto na’in-rua, no mane na’in 16 ho inisiál LSM, JCR, ZCR, GPD, JR, FPG, FTE, QB, DCA, FC, SPJ, JLF, JPS, AVC, LSX, JSC, JS no DPS ne’ebé rejistadu ho númeru prosesu NUC 0031/21.PGGCC.

Ministéiru Públiku (MP), nu’udár nai’n ba prosesu penál akuza  arguido-sira ho krime omesídiu agravadu ne’ebé previstu iha artigu 139, iha kódigu penál Timor-Leste.

Defensór Públiku, Estaquio Guterres, hateten Tribunál aplika prizaun preventiva ba arguidu na’in 11 tanba iha indísiu forte katak, envolve  direta iha problema ne’ebé akontese.

Nia dehan, arguido na’in-haat ne’ebé hetan aprezentasaun periódika, presiza investiga kle’an hodi bele fasilita polísia no Ministériu Públiku (MP), atu bele rekolla liu-tan prova no na’in-tolu ne’ebé hetan TIR tanba laiha evidénsia forte.

“Maibé, defeza sei halo rekursu ba despaixu Tribunál ne’ebé aplika prizaun preventiva tanba deklarasaun ne’ebé durante ne’e arguido-sira fó ba Tribunál, diferente liu ho saida mak MP rona hosi testamuña-sira ne’ebé  fó informasaun. Alende ne’e, arguidu hotu partisipa iha primeiru interrogatóriu deklara la hatene kona-bá akontesimentu ne’e,’’ Estaquio Guterres, hateten ba jornalista Agéncia Tatoli, iha edifísiu TDD, Mandarin, tersa ne’e.

Nia haktuir, tuir deklarasaun arguido-sira nian, momentu ne’eba arguido-sira halibur-malu entre família atu fó kontribuisaun osan hodi ko’alia barlake, ne’ebé partisipa mós hosi matebian maski la’ós família, maibé nu’udár maun-alin ransu ho arguidu-sira ne’ebé komunga doutrina ida hosi arte rituál ida.

Hafoin ne’e, nia hatutan, arguido-sira mak halo diskusaun tanba  hanesan kuñadu ida bo’ot, hatama osan oitoan no ida kiik hatama osan liu fali, ikus-mai iha duni solusaun no matebian rasik  bainhira fó tiha ninia kontribuisaun deside fila-fali ba hala’o atividade baibain la hola parte iha diskusaun.

“Halibur-malu atu tau hamutuk osan, la’ós obrigatóriu tuir kbiit hodi fó ba arguido ida-nia inan ninia barlake. Maibé, la’ós sira halibur hamutuk atu hamosu vítima ne’e mate,’’ Estaquio Guterres hateten.

Maski nune’e, nia esplika tan, tuir entendientu Tribunál nian, katak, ho halibur-malu ne’e maka rezulta matebian hakotu-iis.

“Tuir testamuña ne’ebé hato’o ba MP, ne’ebé lori deklarasaun hodi akuza arguidu-sira katak, involvimentu iha indísiu forte hodi hamate vítima, hafoin   arguidu ida ho inisial A mak lori motór hodi tula matebian ba so’e iha UNPAZ, maibé  realidade hatudu  katak, arguidu ne’e kondúz motór la hatene. Ida -ne’e mak duvída mosu barak ,’’ nia argumenta.

Durante inísiu to’o prosesu funerál ba mate-isin, arguido-sira mós marka prezensa no mós sosa kaixaun.

Defeza hosi arguidu sira ne’e hateten, tanba-ne’e problema la’ós entre matebian ho arguidu-sira no laiha indísiu ida forte ba arguidu sira-nia envolvimentu  direta iha akontesimentu ne’e,  nune’e parte defeza la aseita ho desizaun Tribunál nian ne’ebé aplika prizaun preventiva.

Tanba ne’e, sura hosi despaixu Tribunál nian, durante loron 15, parte defeza sei halo rekursu hodi kontra desizaun prosesu primeiru interrogatóriu iha primeira instánsia.

Prosesu primeiru interrogatóriu ne’e prezide hosi juiz titulár Ivan Suritai, Ministéiru Públiku (MP), reprezenta hosi prokuradór substitute, Domingos Goveria no arguido-sira hetan asisténsia legál hosi defensór públiku, Estaquio Guterres, Jonas Henrique da Costa ho Humberto Alves.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here