Pesoál saúde hala’o teste swab ba ofisiál PNTL iha CCD, tersa (25/05/21). Imajen Tatoli/António Gonçalves.

DILI, 25 maiu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu ida, pozitivu 198, rekoperadu 132 no kazu ativu 2.666.

“Ohin, kazu óbitu ida, kazu foun 198 mai hosi Dili 183 no munisípiu-sira 15, kompostu hosi mane 116  feto 82,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, tersa ne’e.

Notísia relevante:COVID-19: pozitivu 179, rekoperadu 120 no ativu 2.601

Rui Maria de Araújo , esplika kazu óbitu ne’ebé relata ohin, mane ho idade 35, timoroan hela iha aldeia Mota Ki’ik, suku Hera, postu administrativu Cristo Rei.

Tuir istória hosi familia, antes ne’e matebian isin-manas ho mear durante semana rua ona iha uma. La iha istória moras seluk.

“Ohin dader iha kontaktu ba númeru 119 informa katak, ema monu derrepente iha uma. Ekipa konjunta saúde to’o iha nia hela fatin, maibé matebian iis-kotu ona,” nia subliña.

Ho autorizasun familia nian, ekipa konjunta halo swab post mortem no deteta pozitivu SARS-CoV2 ho Cycle Threshold (CT) N2gene 36,4, Egene 34,8, maibé família la aseita rezultadu teste PCR no seidauk aseita atu halo funerál tuir protokolu ne’ebé iha.

Hosi totál kazu detetadu foun 198 ohin, ho idade 12 mai kraik iha na’in-tolu, idade entre 12-59 na’in 189 (95,4%), idade 60 mai kraik iha na’in-neen ne’ebé proporsaun kazu sintomátiku hamutuk 18,1%.

Kumulativu kazu konfirmadu sura hosi 21 marsu 2020 to’o 25 maiu 2021 hamutuk 6.014. Hosi horisehik mai ohin, teste ne’ebé Laboratóriu Nasionál Saúde halo hamutuk 1314 PCR, ho detallu hanesan tuir-mai, Vijilánsia sentinela 64, rastreiu ba kontaktu ka Contact tracing 114, Rastreiu Aleatóriu ka Random Screening 447, Viájen sai-hosi serka sanitária hosi Dili 552, Viájen internasionál 22, Follow up iha kuarentena 115.

Totál testes PCR ne’ebé halo horisehik iha munisipiu-sira seluk, RAEOA no HNGV hamutuk 637,  ho  detalla hanesan tuir-mai, Maubisse 130, Maliana 73, Viqueque 30, Suai 82, Baucau 160, Ermera 44, RAEOA  32 no HNGV 86.

Atu bele hatene surtu ida ninia evolusaun nomós surtu ne’e aumenta ka diminui, indikadór seluk ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur mil abitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste, durante loron hitu ikus maka 13,4/100 mil abitante, enkuantu ba de’it munisípiu Díli 42,7/100 mil abitante.

Lista tuir-mai hatudu valór nominál média (rata-rata) taxa insidénsia COVID-19 durante loron hitu ikus, pur munisípiu Aileu 0,3/100 mil, Lautém 0,0/100 mil, Ainaro 0,4/100 mil,  Liquiça 0,0/100 mil,  Baucau 2,4/100 mil,  Manatuto 2,3/100 mil,  Bobonaro 10,1/100 mil, Manufahi 0,0/100 mil, Covalima 6,7/ 100 mil, RAEOA 0,4/100 mil, DIli 42,7/100 mil, Viqueque 4,9/100 mil, Ermera 0,3/100 mil. 

Insidénsia iha leten, sei nafatin hatudu katak, munisípiu Dili mak fatin ho risku bo’ot liu atu populasaun hetan da’et no hada’et tutuan virus SARS-CoV-2, tuir kedan mak munisípiu Bobonaro ho Covalima.

Informasaun hosi izolamentu

Iha 25 maiu 2021, izolamentu Vera Cruz halo tratamentu ba kazu detetadu na’in 35, iha área obstetrisia na’in 17 no iha medisina interna na’in 17 sira pediatria ida,  iha obstetrisia  na’in 17  kategoria leve (mild) hotu.

Iha área medisina interna na’in 17.  Na’in-haat  grave, ida iha ICU uza CPAP, na’in-tolu uza oxijéniu, na’in 13  moderadu. Kazu ida iha pediatria tama iha kategoria leve ka mild.

Númeru kazu moderadu no grave ne’ebé baixa iha Vera Cruz, hatudu katak, bainhira ema barak liu detetadu pozitivu, barak-liu tan mak sei baixa ho kategoria moderadu no grave.

Apelu

Apela ba populasaun iha Timor-Leste laran tomak atu tu’ur hakmatek, kumpri ho rigór regra serka  sanitária no konfinamentu  domisiliáriu ne’ebé  Konsellu Ministru deside ona implementa hahú 30 abril, no estende tan ona semana rua ba oin.

Husu atu hotu-hotu kolabora ho autoridade saúde, hodi  bele buka-tuir ema hotu ne’ebé  hetan da’et  ona virus ne’e,no izola hosi no labele hada’et-tutan ba ema ne’ebé seidauk hetan da’et.

Ba populasaun tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras COVID-19 da’et ba mai.

Regra sira ne’e, mak hanesan uza máskara, fase liman bebeik ho sabaun ka uza dezinfetante ruma, evita kose liman ba matan, inus ho ibun, bainhira kumprimenta-malu la presiza kaer-liman, bensa-liman, rei-malu ka hakuak-malu, evita halibur-malu barak, hamriik ka tuur dook hosi ema seluk mínimu metru ida ho balun.

Jornalista: Felicidade Ximenes

Editór: Cipriano Colo

HAKEREK NO HATÁN

Please enter your comment!
Please enter your name here