Diretór Ezekutivu Sentru Nasionál Chega (CNC-sigla portugés), Hugo Maria Fernandes. Imajen Tatoli/António Gonçalves

DILI, 25 maiu 2021 (TATOLI)-Diretór Ezekutivu Sentru Nasionál Chega (CNC-sigla portugés), Hugo Maria Fernandes, hateten kazu Ajente Polísia na’in-rua ne’ebé baku vendedór iha Tasi-tolu, domingu (23/05),  tanba menus  orientasaun  di’ak hosi superiór-sira.

Notísia Relevante : Octaviano Thal: “Ha’u la lori nuu tuda Ajente Polísia”

“Ha’u hakarak atu hateten katak violasaun sira-ne’e mosu tanba ajente-sira falta informasaun ka orientasaun hosi  superiór ba membru-sira, tanba kada komandante halo interpretasaun tuir-nia hakarak no hatene kona-bá regra ne’ebé mak la’o, nune’e bainhira to’o iha terrenu, membru-sira ne’ebé la hetan orientasaun didi’ak aplika tuir orientasaun ne’ebé mak mai hosi superiór interpreta kona-ba saida maka tuir loloos hakerek iha regra ruma nia-laran,” Hugo Maria Fernandes, hateten ba Agência Tatoli liuhosi telefónika, tersa ne’e.

Tuir CNC nia hanoin, nu’udár superior-sira iha instituisaun hanesan Polísia Nasionál Timor-Leste (PNTL) tenke iha komprensaun ida di’ak liu kona-ba oinsá mak uza forsa ne’ebé mak bele hateten forsa efetivu hodi responde ba situasaun ida ne’ebé mak tuir loloos ne’e la tama iha kategoria ida ameasa.

“Ha’u hakarak atu hato’o katak aktu sira ne’e akontese beibeik tanba dahuluk ne’e fallansu ne’e iha orientasaun instrusaun hosi superiór ba iha membru sira ka bele mós superiór-sira  la intende ho didi’ak saida maka hakerek iha regra sira kona-ba Estadu Emerjénsia no Serka Sanitária. Ida-idak halo nia interpretasaun, hamosu mós konfuzaun ba iha membru sira,” Hugo Fernandes tenik.

Nia dehan, ko’alia kona-ba direitu umanu durante ne’e CNC hamutuk Provedoria Direitu Umanu no Justisa (PDHJ-sigla portugés) halo ona formasaun direitu umanu ba membru Polísia-sira kona-ba rekomendasaun hosi relatóriu Chega nian.

“Violasaun direitu umanu pasadu ne’ebé akontese iha Timor ne’e barak liu mak forsa Estadu Governu nian mak halo. Nune’e, ami fó formasaun ba Polísia-sira hodi  ko’alia kona-ba oinsá mak situasaun violasaun direitu umanu iha tempu pasadu nian akontese, agora ita ukun-an ona labele atu akontese tan,” membru Konsellu Imprensa periodu 2016-2020 ne’e esplika tan.

Nia afirma, violasaun direitu umanu ne’ebé akontese iha pasadu tanba karik uluk laiha lei no regulamentu sira, nune’e CNC husu PNTL halo prosedimentu ida ne’e atu bele kumpre.

“Ha’u hatene katak prosedimentu lei sira ne’e PNTL iha ona, maibé iha implementasaun ne’e mak seidauk di’ak,” nia hateten.

Diretór Ezekutivu CNC ne’e dehan, importante mak tenke iha aktu unisaun tanba dala ruma ne’e barak akontese  rona ne’e depois ba konferénsia imprensa tama liubá investigasaun ne’ebé kazu nia rohan nunka rona to’o taka de’it.

“Buat ne’e sai tiha fali kultura impunidade ida, kultura impunidade ne’e katak instituisaun ne’e husik hela de’it membru sira halo aktu ida tanba lei no sansaun ida laiha ba sira,” nia tenik.

Jornalista       : Arminda Fonseca

Editór             : Francisco Simões

HAKEREK NO HATÁN

Please enter your comment!
Please enter your name here