SEPS, Joaquim Gusmao, oferese materiál konstrusaun ba família vítima dezastre naturál iha sede suku Bemori, sesta (14/05/21). Imajen Tatoli/Nelson de Sousa.

DILI, 24 maiu 2021 (TATOLI)—Sekretária Estadu Protesaun Sivíl (SEPS), oferese materiál konstrusaun ba família hamutuk 37, iha suku Balibar, postu administrativu Cristo Rei, munisípiu Dili, ne’ebé afetadu ba dezastre naturál iha 04 abríl.

SEPS ofisialmente distribui uluk ba família rua ne’ebé uma hetan estragu totál no família-sira seluk ne’ebé uma aat natón ho kamán sei simu apoiu direta iha armazén loja vitória iha Fomento.

Notísia relevante:SEPS apoiu ai-han ba vítima dezastre naturál iha Manleuana

Pakote materiál konstrusaun ba kada vítima ne’ebé uma hetan estragu totál simu kalén-uma 0.30m tahan 50, pregu kalén 2kg, pregu 12cm 2kg, pregu 10cm 2kg, pregu 7cm 4kg, besi betón 10mm 12 barra, besi betón 8mm  10 barra, arme finu rolu 2 ho semente tonasa 40kg saka 25, no mós osan mão de obra $356 hodi bele selu bada’en.

Sira ne’ebé kategoria aat natón sei simu kalén ho pregu no osan $356, aat kamán sei simu kalén ho pregu kalen ho osan $150.

Xefe Departamentu Jestaun emerjénsia, Ermelinda Pires, hateten, tuir dadus ne’ebé SEPS rejista iha Balibar iha família 66 mak afetadu ba inundasaun, maibé iha rezultadu verifikasaun iha 37 mak presiza duni atu hetan apoiu rekoperasaun.

“Daudaun-ne’e família-sira bele simu uluk ona materiál konstrusaun, maibé kona-bá osan hanesan mão de obra ho ai-kuadradu sei simu iha faze tuir-mai tanba sei hein bainhira osan hetan aprovasaun,” Ermelinda Pires, hateten ba jornalista-sira iha sede suku Balibar, segunda ne’e.

Ho apoiu Governu ne’e bele hakmán família-sira atu bele rekonstrui fila-fali uma ne’ebé hetan estragu, hosi dezastre naturál.

Nia husu ba família-sira atu labele faan fila-fali materiál-sira ne’ebé simu ona, no protesaun sivíl sei serbisu hamutuk ho autoridade lokál, hodi monitoriza katak, materiál hirak-ne’e utiliza duni hodi halo uma.

Xefe Suku Balibar, Afonso Perreira, kontente ho apoiu Governu atu bele tulun netik komunidade iha situasaun kalamidade.

Tuir ajenda iha semana ne’e, SEPS sei serbisu hamutuk ho parseiru balun, hodi distribui mós ai-hán no la’ós ai-hán ba família afetadu 66 iha Balibar, tanba  to’o agora seida’uk simu apoiu umanitáriu.

Jornalista: Nelson de Sousa

Editór: Cipriano Colo

HAKEREK NO HATÁN

Please enter your comment!
Please enter your name here