Plenaria Parlamentu Nasional. Imajen Tatoli Antonio Goncalves.

DILI, 24 maiu 2021 (TATOLI)—Reprezentante povu sira iha uma fukun Parlamentu Nasionál, kondena makaas aktu ajente (oknum) polísia balun ne’ebé baku vendedór sira-ne’ebé hala’o hela atividade negósiu tanba atuasaun nakonu ho bandalizmu.

Vise-Xefe Bankada Kmanek Haburas Unidade Nasionál Timor Oan (KHUNTO), Deputadu António Verdiál de Sousa, lamenta ho atuasaun ajente (oknum) PNTL ne’ebé hatudu aktu bandalizmu baku vendedór fa’an nú iha área fronteira entre Dili no Liquiçá.

“Hanesan deputadu, husu ba entidade sira hanesan PDHJ, CAC, Ministériu Públiku no autoridade administrativa, espesialmente ba VIII Governu Konstitusionál tenke iha vontade polítiku hodi foti asaun rigorozu ba hahalok bandalizmu ne’e,” Vise-Xefe Bankada KHUNTO ne’e levanta liuhosi plenária, segunda ne’e.

Entretantu, membru bankada Frente Revoluzionária Timor-Leste Independente (FRETILIN), Deputadu Dário Madeira, kestiona makaas atuasaun ajente PNTL balun ba kazu refere.

“Ha’u hanesan juventude, kondena makaas atetude polísia balun ne’ebé halo atendimentu ba joven vendedór sira iha territóriu tomak, hanesan horisehik akontese iha estátua João Paulo II, semana liubá akontese iha Becora no akontese iha fatin barak. Atetudu ajente PNTL ne’e hanesan fali bandalizmu,” nia lamenta.

Nia dehan, tempu ona tenke reforma mentalidade ajente PNTL sira no husu ba instituisaun relevante tenke tau kestaun ne’e sériu.

Entretantu, Xefe Bankada Partidu Demokrátiku (PD), Deputadu António da Conceição ‘Kalohan’ kestiona aktu brutalizmu hosi ajente PNTL balun.

“Ita haree ita hanoin, baku ema ida-ne’ebé mesak hela ne’ebé fa’an sasán ho nia karrosa, laiha aglomerasaun populasaun iha-ne’ebá. Ne’e tanba saida,” Xefe Bankada PD ne’e preokupa.

Nune’e mós Deputada Bankada CNRT, Maria Barreto ‘Gorumali’ husu instituisaun kompetente investiga kazu ne’e ho didi’ak.

“Ha’u-nia observasaun mak ne’e, loloos ne’e vendedór ne’e laiha asuntu grave ida-ne’ebé hodi halo agresaun fíziku. Ha’u rekomenda ba Governu ida-ne’e katak karik halo fali avaliasaun ba regra sira-ne’ebé mak governu fó-sai. Dalaruma media sira-ne’e mak la efetivu, ne’e mak halo ita-nia ajente polísia sira sente hanesan baruk ona,” nia dehan.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here