Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 24 marsu 2021 (TATOLI)—Ministru ba Asuntu Parlamentár no Komunikasaun Sosiál (MAPKOMS) Francisco Martins da Costa Pereira Jerónimo, informa ba reprezentante povu sira iha uma fukun Parlamentu Nasionál, katak kazu ajente polísia baku vendedór iha ona prosesu investigasaun.

Notísia Relevante: PN kondena aktu ajente polísia baku vendedór

Governante ne’e rejista preokupasaun Parlamentu Nasionál nian, relasiona ho atuasaun membru PNTL ne’ebé mak tuir deputadu sira katak ladún di’ak.

“Ami mós haree katak ida-ne’e presiza atensaun. Atu informa de’it katak kazu ida-ne’e tama ona iha investigasaun. Ami hein katak iha tempu badak bele rona nia rezultadu investigasaun,” Ministru Francisco Martins da Costa Pereira Jerónimo, informa ba deputadu sira, iha uma fukun, segunda ne’e.

Nia relata ba deputadu katak kazu ida-ne’ebé akontese iha Kuluhun no kazu sira seluk iha prosesu investigasaun nia laran.

MAPKOMS rejista no kontinua kontaktu ho parte kompetente hodi aselera prosesu investigasaun.

Entretantu, Prezidente Parlamentu Nasionál, Deputadu Aniceto Longuinhos Guterres Lopes, husu Governu konsidera preokupasaun uma fukun nian.

“Aktu agresaun fíziku ne’e, husu atu fó atensaun espesiál ba asuntu ida-ne’e,” PPN informa ba Ministru ba Asuntu Parlamentár no Komunikasaun Sosiál (MAPKOMS) Francisco Martins da Costa Pereira Jerónimo.

Jornalista: Evaristo Soares Martins

Editór: Cancio Ximenes

HAKEREK NO HATÁN

Please enter your comment!
Please enter your name here