Abitante-sira, forma hela iha edifísiu MSSI ho dokumentu, hodi halo rejistrasaun atu hetan subsídiu hosi Governu durante serka sanitária, kinta, (19/05/21). Imajen Tatoli/António Gonçalves.

DILI, 23 maiu 2021 (TATOLI)—Sala Situasaun, Sentru Integradu Jestaun Krize (SIJK), rejista kazu óbitu rua, pozitivu 156, rekoperadu 122 no kazu ativu 2.542.

“Kazu foun 156 iha Dili 130 no hosi munisípiu-sira hamutuk 26. Hosi kazu foun ne’e, iha mane na’in 86 no feto 70,” Koordenadór Forsa-Tarefa ba Prevensaun no Mitigasaun, Rui Maria de Araújo, hateten liu hosi komunikadu, domingu ne’e.

Notísia relevante:COVID-19: Pozitivu 188, rekuperadu 153 no ativu 2.510

Hosi totál kazu detetadu foun ne’e ema ho idade 12 mai kraik na’in-tolu, entre tinan 12-59 na’in 150 (96,1%), idade 60 mai kraik iha na’in-tolu  ho proporsaun kazu sintomátiku hamutuk 10,8%.

Totál kazu konfirmadu kumulativu iha 23 maiu 2021 sura hosi 21 marsu 2020 hamutuk 5.637, no totál óbitu iha domingu (23/05/2021) hamutuk na’in-rua.

Hosi horisehik mai ohin, teste ne’ebé Laboratóriu Nasionál Saúde halo 685 PCR, iha Dili, ho detalla hanesan, vijilánsia sentinel tolu, rastreiu ba kontaktu ka Contact tracing 116, rastreiu Aleatóriu ka Random Screening 158, viajen sai hosi serka sanitária Munisipiu Dili 377, viajen internasionál neen (6), Follow up iha kuarentena 25.

Totál teste PCR ne’ebé halo iha loron sábadu (22/05) iha munisípiu sira seluk, Rejiaun Administrativa Espesiál Oecusse Ambeno (REAOA) no Ospitál Nasionál Guido Valadares (HNGV), hamutuk 418, ho detalla hanesan, iha munisípiu Baucau 50, Ermera 47, Maliana (Bobonaro)  66, Maubisse (Ainaro) 58, RAEOA laiha (0), Suai (Covalima) 81, Viqueque 48 no HNGV 68.

Atu bele hatene surtu ida ninia evolusaun, no mós surtu ne’e aumenta ka diminui, indikadór ida ne’ebé matenek-na’in epidemiolojia nian uza, maka insidénsia.

Konvensionalmente, insidénsia sukat totál kazu foun kada loron pur 100 mil habitante, no hatudu risku ne’ebé populasaun iha atu hetan da’et moras ida.

Hosi insidénsia COVID-19 iha Timor-Leste durante loron hitu ikus maka 12,7/100 mil abitante, enkuantu ba de’it munisípiu Dili 40,0/100 mil abitante.

Insidénsia ne’e sei nafatin hatudu katak, munisípiu Dili maka fatin ho risku bo’ot liu, atu populasaun hetan da’et no hada’et tutan virus SARS-CoV-2.

Entretantu, informasaun hosi izolamentu iha 23 maiu 2021, iha sala izolamentu Vera Cruz halo tratamentu ba kazu detetadu na’in 33. iha obstetrisia na’in 10, no iha medisina interna na’in 22, pediatria 14.

Sira nain-10 iha obstetrisia kategoria leve ka mild hotu,  hosi sira na’in 22 iha medisina interna na’in-hitu (7) grave ka ida (1) iha ICU uza CPAP, neen (6) uza oxijéniu, na’in 11 moderadu, na’in-haat (4) leve ka rekupera hosi kategoria grave no moderadu, kazu ida (1) iha pediatria tama iha kategoria leve ka mild.

Rejista óbitu rua

Sentru Integradu Jestaun Krize  rejista tan kazu óbitu na’in rua ho ninia detalla hanesan, feto tomoroan feto ida ho idade 73 ba HNGV iha 13 maiu tanba isin-manas, mear maran, iis-bo’t, diagnostikadu ho pneumonia, no deteta mós SARS[1]CoV2 ho Cycle Threshold (CT) N gene 23,6, c gene 23,8, matebian iha istória diabetes ho komplikasaun neuropatia diabétika.

Hahú kedan 13 maiu kalan, halo tratamentu iha fatin izolamentu Vera Cruz ho oxijéniu iha kánula, hafoin iha 15 maiu kontinua ho tratamentu oxijéniu liu hosi CPAP ka Continuous Positive Airway Pressure iha ICU, maibé tamba saturasaun oxijéniu nafatin la sufisiente, médiku intensivista deside halo ventilasaun asistidada liu hosi ventiladór, enkuantu kontinua ho tratamentu ba diabetes no mós tratamentu seluk ba sindroma insufisiénsia respiratória aguda (SIRA), nune’e iha sábadu kalan tuku 19:55 matebian iis-kotu, tanba multiple organ failure ka órgaun lubuk-ida iha isin la funsiona.

Nune’e mós timoroan feto ida ho idade 52 ba HNGV iha 21 maiu ho iis-bo’ot, matebian moras iha uma semana rua ona, iha istória diabetes, tensaun aas, no problema tiróide.

Iha HNGV diagnóstikadu nu’udár sindroma insufisiénsia respiratória aguda (SIRA), rezultadu teste PCR pizitivu ho CT N2 gene 38,4  no E gene 37,3, matebian transferida ba fatin izolamentu Vera Cruz iha kedan loron ne’e, hahú tratamentu oxijéniu liu hosi CPAP ka Continuous Positive Airway Pressure iha ICU, maibé tanba saturasaun oxijéniu nafatin la sufisiente, médiku intensivista deside halo ventilasaun asistidada liu hosi ventiladór, enkuantu kontinua tratamentu ba ninia kondisaun saúde sira seluk.

Iha domingu (23/05) dader tuku 09:15 matebian iis-kotu, tanba multiple organ failure ka orgaun lubuk-ida iha isin la funsiona.

Mate-isin hosi matebian na’in-rua ne’e idaidak nia família koordena ona ho ekipa SIJK atu hala’o serimónia funerál tuir protokolu ne’ebé iha.

Jornalista: Antónia Gusmão

Editór: Cipriano Colo

HAKEREK NO HATÁN

Please enter your comment!
Please enter your name here